Бүгүн Мүрү 1-гы №-дээх орто оскуолатын музейыгар Ленинграды блокадаттан босхолооһуҥҥа кыттыбыт, үс төгүл «Хорсунун иһин» мэтээлинэн наҕараадаламмыт оскуола математикаҕа, физикаҕа учуутала Захаров Георгий Петрович төрөппүт кыыһа, үлэ бэтэрээнэ Клавдия Георгиевна Захарова (Черноградская) анаан кэлэ сырытта.

Оскуоланы 1966 сыллаахха 11 кылааһынан бүтэрбит оҕолор, билигин бары тус улэлэринэн, олохторунан убаастанар дьон, 2023 сыллаахха «Билиини биэрбит, олоххо кынаттаабыт кыһабыт» диэн ааттаан таһаартарбыт кинигэлэрин музейга бэлэхтээтэ. Ахтыылары хомуйан бэчээккэ СӨ тыа хаһаайыстыбатын үтүөлээх үлэһитэ, тыа хаһаайыстыбатын наукатын кандидата Данилова (Емельянова) Анна Георгиевна бэлэмнээбит. Оскуолатааҕы кэмнэрин кэпсиир уонна дьиэ кэргэннэрин билиһиннэрэр хаартыскалар киирбиттэрэ кинигэни баай ис хоһооннуур.

Бу 1966 сыллааҕы выпуск 2016 сыллаахха сайын оскуоланы бүтэрбиттэрин 50 сылыгар үөрэммит оскуолаларыгар сылдьан ыалдьыттаан ааспыттара. Сэрии кыттыылааҕын кыыһа Клавдия Георгиевна, уола Георгий Георгиевич улуус сайдыытыгар бэйэлэрин кылааттарын киллэрбит үтүө үлэһиттэр. Ол курдук, Клавдия Георгиевна тутааччы инженер идэлээх. Кини Дьокуускайга Рыбпром уонна Агропромстрой хапытаалынай тутуутун отделыгар, онтон Минсельхозка үлэлээбитэ. Кэргэнин Семён Семёнович Черноградскайы сопхуоска Өнөр отделениетыгар үлэҕэ ыҥыраннар, куораттан Өнөргө көһөн тахсыбыттара. Кэлин кэргэнин үлэтинэн Бороҕоҥҥо кэлэн Клавдия Захаровна 1996-2002 сылларга Уус-Алдан дьаһалтатыгар экономика отделыгар үлэлээн сынньалаҥҥа тахсыбыта. Экономист уонна юрист идэлээх икки кыыстаах, сиэннээх. Билигин дойдутугар Бороҕоҥҥо олорор, күннэтэ хаамыынан дьарыктанар, уопсастыба олоҕуттан тэйбэккэ араас тэрээһиннэргэ сылдьар.

Буойун кыыһа үлэҕэ үтүө сыһыана, олоххо көҕө атыттарга холобур буолар.

Елена Сыроватская, уопсас. кэрэсп.