Лөгөй орто оскуолатын базатыгар бэҕэһээ “Эдэр профессионаллар” чемпионат “Бортпроводниктар сулууспалара” диэн бэрт интэриэһинэй компетенциятын муниципальнай этаба буолла. Бу компетенция 14–16 саастаах оҕолор ортолоругар ыытыллар.
Быйылгы муниципальнай этапка барыта 6 хамаанда Чэриктэй, Найахы, Лөгөй, Суотту, Мындааба уонна Дүпсүн орто оскуолаларыттан кытынна.
Чемпионакка бортпроводник идэтигэр интэриэстээх оҕолор пассажирдары самолет көтөрүгэр бэлэмниир иһитиннэриилэрин этэргэ, көтүү кэмигэр араас садаачалары быһаарыыга уонна самолет бортугар пассажирдарга утаҕы биэриигэ сатабылларын көрдөрдүлэр.
Экспердэринэн “Полярные авиалинии” хампаанньа бортпроводнига Алена Попова салалтатынан кыттыбыт оскуолалартан бэрэстэбиитэл учууталлар үлэлээтилэр.
Түмүккэ кыайыылааҕынан Лөгөй оскуолатын хамаандата ааттанна (сал. М. Дьяконова), 2-с миэстэни Чэриктэй оскуолатын үөрэнээччилэрэ (сал. С. Свешникова), 3-с миэстэни Мындааба оскуолатын хамаандата (сал. М. Аржакова, Л. Готовцева, А.Слепцова) ыллылар.