Биир дойдулаахпыт, эдэр урбаанньыт Валерий Шадрин Ньурба улууһуттан Тута диэн позывнойдаах хорсун байыаска «Рысь» вездеходу бэлэх уунна.
Чэриктэй нэһилиэгиттэн төрүттээх Валерий Шадрин «Рысь» тэрилтэтэ алтыс сылын вездеходтары оҥорон таһаарар. Өрөспүүбүлүкэ салалтатын кытта дуогабардаһан, байыаннай дьайыыга «Рысь-3 Пикап» массыынаны оҥорон ыытар. Валерий Валерьевич соторутааҕыта байыаннай дьайыыга өстөөҕү кытта суос-соҕотоҕун киирсэн, кинилэргэ элбэх хоромньуну таһааран тыыннаах ордубут хорсун байыас туһунан ааҕан, бу саха саллаата хайдахтаах хорсун, күүстээх санаалааҕын сөҕөн-махтайан, киэн туттан, дойдутун туһугар махталын биллэрэн, маннык бэлэх оҥорорго санаммыт.
Кини бу туһунан маннык эттэ:
– «Один в поле не воин» диэн санааны утары дакаастаабыт уол туһунан ватсап ситиминэн кэлэр суруктары ааҕан, билэн, бу хорсун уолу өйүүргэ санаа киирбитэ. Чахчы патриот, геройдуу быһыыны оҥорбут диэн киэн тутуннум. Хорсун байыас Андрей Григорьев биэс оҕолоох, бэйэтэ элбэх оҕолоох дьиэ кэргэҥҥэ 8-с оҕо буолар. Инникитин өрөспүүбүлүкэ өйүүрэ буоллар, маннык вездеходтары Герой аатын ылбыт дьоммутугар барыларыгар оҥорон биэриэ этибит. Билиҥҥи аныгы кэм байыаннай дьайыытыгар бачча сэрии сэбэ-сэбиргэлэ, тиэхиньикэ сайдыбыт кэмигэр уот кутаа үөһүгэр сылдьыы диэн сүрдээх дьыала буоллаҕа. Онон хорсун буойуттарбытын өйүөххэ, өрө тутуохха!
Бу курдук үтүө санаалаах биир дойдулаахтарбыт улууспут туһугар киэн туттууну үөскэтэллэр.