Бэрт Ууһуттан төрүттээх Василий Петрович уонна Ленскэй улууһун, Толоон бөһүөлэгитэн төрүттээх Татьяна Ионовна Черкашиннар ыал буолан Өлтөх нэһилиэгин Бэйдиҥэ бөһүөлэгэр олохсуйбуттара. Кинилэр түөрт уол, үс кыыс оҕону төрөтөн олус эйэлээхтик олорбуттара. Бэйдиҥэ бөһүөлэгэ спорду өрө туппут дойду буолан, уолаттар спордунан, чуолаан тустуунан сөбүлээн дьарыктаналлара. Кинилэр аҕалара нэһилиэккэ Күүстээх Баһылай диэн убаастанар, үлэһит киһи этэ. Күүстээҕин көрдөрбөтөҕө буолан баран, кини илиитигэр ураты күүстээҕин биир дойдулаахтара билэллэрэ.
Вася 1977 муус устар 5-с күнүгэр бастакы, күүтүүлээх оҕонон күн сирин көрбүтэ. Олус элэккэй буолан оҕо сааһыттан олус элбэх доҕордоох улааппыта, кини тэлгэһэтигэр куруук оҕо-аймах мустар эргийэр киинэ буолара. Вася 1985 сыллаахха Бэйдиҥэ орто оскуолатыгар үөрэнэ киирбитэ. Өр сыллартан учууталлыыр, кинини алын, орто сүһүөххэ уруһуйга үөрэппит Лариса Васильева Вася уонна кини дьиэ кэргэнин туһунан олус иһирэхтик ахтыбытыттан кэпсээтэххэ, Вася бииргэ төрөөбүттэригэр уонна кылааһын оҕолоругар олус үчүгэй сыһыаннааҕа, куруук үөрэ-мичилийэ сылдьар буолара. Оччолорго оскуолаҕа тыраахтары ыытарга курска үөрэтэллэрэ. Аҕата тырахтарыыс буолан, Вася тиэхиньикэҕэ олус сыһыаннааҕа, ол да иһин олус умсугуйан үөрэммитэ, праваны кылааһын оҕолоруттан ким хайа иннинэ ылбыта. Биэнсийэҕэ тахсан баран аҕата оскуолаҕа дворнигынан үлэлээбитэ. Ол кэмҥэ оскуола таһа ып-ыраас турбутун учуутала сөҕө-махтайа кэпсиир. Уолаттар аҕаларыгар көмөлөһөн киэһэ аайы хомуйан кэбиһэллэр эбит. Оннук, үлэҕэ бэриниилээх, эппиэтинэстээх ыал этилэр этэ диэн бэлиэтиир.
1994 сыллаахха Василий оскуоланы ситиһиилээхтик бүтэрэн Өлтөх нэһилиэгэр дьиэ-уот коммунальнай хаһаайыстыбатыгар тырахтарыыһынан биир сыл үлэлээн баран, ытык иэһин төлүү аармыйаҕа сулууспалыы барбыта. Танковай ротаҕа сылдьан күүс-уох өттүнэн лаппа кыанар уонна бэрээдэги тутуһар буолан биһирэнэрэ. Оттон 1997 с. Бэйдиҥэҕэ кэлэн үлэтин салгыыр.
Тиэхиньикэттэн иҥнэн турбат уол ыһыыга, хомуурга үлэлии сылдьан, Өлтөх нэһилиэгэр баһаарынай чаас тэриллэн онно суоппарынан үлэлии киирэр, онно алта сыл үлэлээн баран, ыал буолан улуус киинигэр көһөн киирэллэр. Баһаарынай чааска бииргэ үлэлэспит кэллиэгэтэ Петр Тарскай Василий спортсмен бэрдэ буолан, баһаарынайдар ортолоругар үгэс быһыытынан сыл аайы ыытыллар спортивнай күрэхтэһиигэ хамаандатын кытта үгүстүк өрөгөйдөөбүтүн туһунан кэпсиир. Кини хапсаҕайдьыт, тустуук, гиревик, хары баттаһыыга эмиэ барытыгар дэгиттэр кыахтааҕа, дьоҕурдааҕа. Ону таһынан «булт диэн баран муннукка ытаабыт» байанайдаах булчут этэ.
Василий тапталлаах кэргэнэ – иитээччи идэлээх Елизавета Николаевна буолар. Курбуһахтан төрүттээх Елизавета сахалыы остуол оонньууларынан дьарыктанар, үгүс күрэхтэһиигэ кыттан спорт маастарыгар хандьыдаат буолбута, ыллыыр дьоҕурдаах, уопсастыбаннай үлэҕэ өрүү көхтөөх киһи. Василий, Елизавета Черкашиннар икки кыыс оҕолоохтор. Лиза маҥнайгы кылаас үөрэнээччитэ уонна Валерия икки саастаах.
Василий Мүрү нэһилиэгэр 2016 с. “Якутскэнерго” тэрилтэҕэ тырахтарыыһынан, оттон 2018 с. “Якутдорстрой” тэрилтэҕэ грейдергэ үлэлээбитэ. Ыал улахан оҕото буолан, бырааттарын, балтыларын куруук көрө-истэ сылдьара, бэйэтин дьиэ кэргэнигэр кыһамньылаах аҕа, эрэллээх дурда-хахха этэ.
2022 сыл алтынньы 4 күнүгэр бэбиэскэ кэлбит күнүн кэргэнэ Елизавета маннык кэпсиир: “Киэһэ үлэлээн дьиэтигэр кэлбитин кэннэ бэбиэскэ аҕалан биэрбиттэрэ. Олох куотуммаппын, барабын диэн тута эппитэ. Сарсыарда бараары сылдьан утуйа сытар кыргыттарын уһугуннаран хаартыскаҕа түспүтэ, “аны эргиллибэтим буолуо” диэбитэ. Анал байыаннай дьайыыга тиийэн тиэхиньикэттэн илиитин араарбакка, өрөмүөннүүр батальоҥҥа сылдьыбыта, онтон кэлин уот сэриигэ киллэрбиттэр этэ. Кэпсии сылдьыбат этэ гынан баран, биирдэ тулуйбакка “20-лээх эрэ уолаттар өлөллөр” диэн наһаа хараастан туран ытамньыйан ылбыттаах. Олох сэдэхтик, сибээскэ таҕыстаҕына эрэ эрийэрэ. Тиһэх күнүгэр күнүс икки чааска эрийэ сылдьыбыта, саҥата мөлтөөбүт этэ, сонуммутун сураспыта, антах балаһыанньа ыараабытын туһунан эппитэ уонна: «Биһигини ханна эрэ ырааһыйаҕа аҕаллылар, билигин аһаан, утуйан ылан баран барабыт”, – диэбитэ уонна бүтэһиктээх кэпсэтиитин курдук таптыыр, быраһаайдаһар тылларын эппитэ. Кэлин билбитим – ол кэннэ биир чаас буолан баран сырдык тыына быстыбыт. Снаряд кыырпаҕа кэлэн түспүт этэ».
Василий Черкашин өлбүтүн кэннэ «Эр санаа” уордьанынан наҕараадаламмыта. Василий Васильевич Черкашин мэхээнньик-суоппар быһыытынан, тааҥканан кыргыһыы хонуутугар иккитэ киирэн, онно соҕотох ордон хаалыа да буоллар, байыаннай сорудаҕы толорбут хорсун быһыыта умнуллубат. Кини 2023 сыллаахха бэс ыйын 10 күнүгэр Донецкай куораты көмүскүүр кыргыһыыга сырдык тыына быстыбыта.