Ханан да буоларын курдук, Бээрийэ нэһилиэгин ходуһаларыгар от ыйын саҥатыгар түспүт ардахтар кэннэ балай да ото уһаан, хойдон, отчуттар бары окко киирэн үлэлии сылдьаллар. От үүнүүтэ орто диэн санаара бөҕөх, халлаан эрэ туран биэрдэр үрдүк хаачыстыбалаах от оттонуоҕа.
Бастакы хотуур ото сүмэһиннээх буолан, куурара бытаан, ону сөпкө куурдуохха наада. Сөптөөхтүк хаппыт оту ылан илиигэ жгут курдук эрийдэххэ, төттөрү өһүллүөхтээх. Маны ханнык баҕарар көрүҥүнэн (бугуллааһын, рулоннааһын, пресс) оттуур дьон бары тутуһуохтаахтар.
Нэһилиэкпитигэр ынах сүөһү барыта чааһынай бас билиигэ баар, үүт туттарыллыбат. Ол да буоллар, ыйын аайы ыаллар ынахтарын үүтүн олохтоох ветеринарнай пууҥҥа мастит ыарыыга бэрэбиэркэлэтэллэр. Бу эмиэ бэйэ аһыыр аһа үчүгэй хаачыстыбалаах буоларын хонтуруоллааһын, бэйэ доруобуйатын көрүнүү буолар.
Ынах сүөһү төрөөһүнэ бүтэн, бу күннэргэ бүтэһик ньирэйдэри биркалаан «РегАгро» программаҕа киллэрии, сүөһү модьуун ыарыытын утары быһыы оҥоһуллан бүттэ. Маны таһынан саҥа төрөөт да атаҕа тостубут (ийэтэ тосту үктээбит буолуон сөп) ньирэйи атаҕын ветбыраас гипсэлээн, хаһаайка 73 саастаах Агафья Охлопкова оҕолуу бүөбэйдээн, ньирэй билигин бэрткэ хаамар, ийэтин кытта сыһыыга тэҥҥэ сылдьар буолла.
Быйыл күһүн Российскай Федерация Бырабыыталыстыбатын муус устар 5 күнүнээҕи 550 нүөмэрдээх дьаһалыгар олоҕуран сылгы барыта чиптэнэн “РегАгро” программаҕа киириэхтээх, онно бэлэмнэнэн хас биирдии сылгылаах киһи «Меркурий» программаҕа регистрациялаах буолуохтаах. Бу программаҕа киирэргэ сылгылаах дьон бары сайабылыанньа суруйар, бланкалар олохтоох ветеринарнай учаастактарга, пууннарга бааллар.
Саргылаана Бурнашева, ветеринарнай быраас