Оҕолорго аналлаах Уус Алданнааҕы социальнай-реабилитационнай киин специалистара ахсынньы 1 күнүгэр «Во имя семьи» социальнай десанынан Баатаҕай нэһилиэгэр оскуола үөрэнээччилэрин, үлэһиттэрин, төрөппүттэрин хабан үлэлээтибит.
Тэрээһини ыытыыга нэһилиэк баһылыгын солбуйааччы Александра Петрова, оскуола директора Алеанна Бурнашева сарсыардаттан саҕалаан бииргэ үлэлэстилэр.
Педиатр-врач Галина Саввинова олохтоох балыыһаҕа уонна бииригэр диэри саастаах оҕолору дьиэнэн сылдьан көрдө. Педагогтар оскуолаҕа оҕолор саастарын учуоттаан занятиелары, бэсиэдэлэри ыыттыбыт. Куруһуок салайааччыта Зоя Сивцева алын сүһүөх кылаас үөрэнээччилэригэр ыыппыт маастар-кылааһыгар оҕолор кыһаллан дьарыктаннылар. Ис дьыала отделын ПДН старшай инспектора Владилен Алексеев учууталларга, үөрэнээччилэргэ, оҕолорго бэрээдэк боппуруоһугар бэсиэдэ ыытта.
Маны таһынан кылаас салайааччыларыгар семинары, төрөппүттэргэ үөрэхтээһини тэрийдибит. Оҕолор ыытыллыбыт занятиелары сэҥээрдилэр, бары көхтөөхтүк кытыннылар.
Бу күн холбоон барыта 87 киһи араас өҥөнөн туһаннылар. Оскуола коллективын кытары бииргэ үлэлииргэ сөбүлэҥ түһэристибит.
Юлия Бурцева, социальнай педагог