Худуоһунньук-маастар идэлээх Тулунаттан төрүттээх Ланара Петухова Саҥа дьыллааҕы үчүгэйкээн оонньуурдара хас биирдии дьиэ кэргэҥҥэ бэртээхэй бэлэх буолуохтарын сөп. Бу харыйаҕа ыйанар дьэрэкээн мас дьиэ оонньуурдар бэйэбит төрүт матырыйаалбытынан оҥоһуллубут буолан, оҕоҕо, киһиэхэ буортута суохтар. Ланара бу оҥоһуктарын бэс мастан эрбээн, шкуркалаан, акриловай кыраасканан уруһуйдаан киэргэппит. Ол кэнниттэн акриловай лагынан сотон бөҕөргөппүт. Маннык онньуурдары өссө “баҕа санаа оонньуурдара” диэн ааттыыллар. Ол эбэтэр саҥа сылга саҥа дьиэҕэ киириэн эбэтэр атыылаһыан баҕалаах ыал харыйатыгар маннык дьэрэкээн дьиэ оонньууру ыйаатаҕына, баҕа санаата хайаан да туолар.
Ланара Петухова бу дьарыгын туһунан кылгастык бу курдук билиһиннэрдэ: “Мин Намнааҕы педколлеһы бүтэриэхпиттэн ыла «Чороон 21 үйэ» хампаанньаҕа үлэлии сылдьабын. Художественнай мастерскойбутугар 5 кыыс буолан үлэлиибит. Сүрүннээн үлэбитигэр фарфоровай чорооннорго, кытыйаларга, ону таһынан араас иһиттэргэ аныгылыы сахалыы оһуордары, уруһуйдары оҥоробут, түһэрэбит. Үлэм таһынан бэйэм быйыл харыйа оонньуурдарын оҥорон атыыга таһаарарга санаммытым, бу оҥоһуктарым – бастакы холонууларым. Маннык бэйэ илиитинэн оҥоһуллубут оҥоһуктар ураты көстүүлээх, хатыламмат уонна кэрэ буолаллар. Түгэнинэн туһанан, биир дойдулаахтарбын кэлэн иһэр Саҥа дьылынан эҕэрдэлиибин уонна бука бары доруобай, уһун үйэлээх, эйэлээх уонна дьоллоох буолалларыгар баҕарабын!”
Оттон биһиги эрэдээксийэ аатыттан, Саҥа дьыллааҕы тыыны бэлэхтээбит, харахпытын сымнаппыт бэртээхэй оҥоһуктаах Ланара Петуховаҕа истиҥ сэһэргэһиитин иһин махталбытын кытары дьоҥҥо үөрүүнү бэлэхтээбитиҥ бэйэҕэр соннук үтүөнү эрэ аҕаллын диэн баҕа санаабытын тиэрдэбит.
Екатерина Захарова