Саха кыргыттара лүөччүк быһыытынан халлааҥҥа талаһалларын улаханнык истибэт этим. Арай Аҕа дойду Улуу сэриитин кэмигэр өстөөҕү сууһарбыт Вера Захарова саха дьахталларыттан бастакы лүөччүк дэнэрэ. Кини кэнниттэн аҕыйах сыллааҕыта «Полярные авиалинии» хампаанньаҕа Марфа Иванова диэн лүөччүк кыыс баарын туһунан суруйан тураллар.
Уус алданнар үөрүөхпүт иһин, биһигиттэн даҕаны халлаан куйаарын устун тилийэ көтүөн баҕалаах кыыстаах эбиппит. Түүлээх нэһилиэгиттэн төрүттээх Арияна БОГДАКУМОВА билигин Дьокуускайдааҕы авиационнай-техническай колледж иккис кууруһун устудьуона.
Бу идэни хайдах талбытын туһунан Арияна маннык кэпсээтэ:
– Бу идэни талыым соһуччу соҕус диэхпин сөп. Кыра эрдэхпиттэн ЫБМ эбэтэр полиция үлэһитэ буолар баҕалаах этим. Онтон арай 2022 сыллаахха Түүлээххэ авиатордар кэлэн барбыттара. Мин оччолорго 10-с кылааска үөрэнэрим. Онно оскуолабытыгар авиация туһунан кэлэн кэпсээбиттэригэр олус интэриэһиргээбитим. Ону сыал-сорук оҥостоммун, 2023 сыллаахха оскуолабын бүтэрэн баран, Дьокуускайга авиационнай колледжка туттарса киирбитим. Эксээмэннэрбин туттаран, медицинскэй хамыыһыйаны ааһан үөрэххэ киирэн, этэҥҥэ үөрэнэ сылдьабын. Эһиил бүтэрэбин, лүөччүк идэлээх буолуохтаахпын. Билигин эксээмэммин туттаран, медхамыыһыйаны ааһан бараммын, ыам ыйыттан балаҕан ыйын бүтүөр диэри практикаҕа барыахтаахпын.
«Саха сатаабатаҕа суох» диэн маны этэн эрдэхтэрэ. Сэдэхтик да буоллар, кыргыттар туруннахтарына үрдүк мэҥэ халлаан «ньуурунан» дайаллар эбит. Барыта этэҥҥэ буоллаҕына, Арияна Богдакумова Уус Алдан дьахталларыттан бастакы лүөччүк буолар кыахтаах. Кытаанах санаалаах, толлугаһа суох хоодуот кыыспытыгар ситиһиилэри баҕарыаҕыҥ.
Афанасий Сектяев