Бороҕоннооҕу Е.Ф. Габышев аатынан оҕо спортивнай оскуолатын иһинэн чэпчэки атлетика секцията үлэлиир. Секцияҕа уопсайа 80-тан тахса оҕо сөбүлээн сылдьар. Тренердэр Мария Егоровна Слепцова уонна Иннокентий Валерьевич Колодезников оҕолору спорка уһуйаллар. Оҕолор сарсыарда, эбиэт кэннэ уонна киэһээтин саастарынан арахсан көхтөөхтүк дьарыктаналлар.
Н.Н. Тарскай аатынан саҥа спортивнай дыбарыас арыллан оҕолор олус үөрэн, сүргэлэрэ көтөҕүллэн сылдьаллар. Сырдык ыраас, киэҥ-куоҥ саалаҕа сүүрүүктэр үөрэ-көтө кэлэн кыһаллан, дьарыктарын быспаттар. Араас күрэстэргэ быыстала суох көхтөөхтүк кытталлар. Ол курдук өрөспүүбүлүкэтээҕи күрэстэргэ ситиһиилээхтэр. 2023 сыллаахха “Спортивные якутяне” күрэскэ Диана Егорова 3 000 м. үһүс миэстэни ылары ситиспитэ. Билигин Кисловодскай куоракка “Азия оҕолоро” резервэҕэ киирэн хомуурга кытта сылдьар.
Инники ыра баҕа санаалара диэн оҕолор доруобайдык сылдьан күүстээхтик эрчиллэн, бүтүн Арассыыйатааҕы, норуоттар икки ардыларынааҕы араас күрэстэргэ ситиһиилээхтик кыттыылара буолар.
Светлана Сивцева