Быйыл дойду үрдүнэн Улуу Кыайыы 80 сылын бэлиэтиэхпит. Ол аата албан ааттаах буойуттарбытын ахтан-санаан, чиэстээн ааһыахпыт. Оттон Россияҕа быйыл Аҕа дойдуну көмүскээччи, Саха сиригэр Ийэ дойдуну көмүскээччи сыллара биллэрилиннилэр.
Олунньу 23 күнэ – Аҕа дойдуну көмүскээччи күнэ. Кыратык историяны сэгэтэн көрүөҕүҥ. Аҕа дойдуну көмүскээччи күнэ диэн ССРС ыһыллыбытын кэннэ баар буолбут бырааһынньык. Өктөөп өрөбөлүүссүйэтин кэнниттэн 1922 сыллаахха Сэбиэскэй Социалистическай Республикаларын Сойууһа тэриллээтин кытары Кыһыл аармыйа күнэ диэн олохтоммута. Онтон Аҕа дойду сэриитин кэнниттэн 1945 сыллаахха Сэбиэскэй аармыйа күнэ диэҥҥэ уларытыллар. Түөрт сыл буолан баран, 1949 сыллаахха өссө уларытыллан Сэбиэскэй аармыйа уонна муоратааҕы байыаннай флот күнэ диэн буолбута. Онтон Сэбиэскэй Сойуус ыһыллан, дойду тутула уларыйан Россия бэйэтэ судаарыстыбаннай тутулланан сорох бырааһынньыктар ааттара эмиэ уларыйбыта. Ол быһыытынан 1992 сылтан Аҕа дойдуну көмүскээччи күнэ диэн баар буолбута. Бу бырааһынньыгы урукку сойууһунай өрөспүүбүлүкэлэр, билигин туһунан судаарыстыба буолан олорор Беларусь, Кыргызстан, Таджикистан эмиэ олунньу 23 күнүгэр бэлиэтииллэр.
Аҕа дойдуга бэриниилээх буолуу чиэһин ылынан биһиги уолаттарбыт эйэлээх да кэмҥэ араас сэриилэргэ кыттыбыттара. Онон хайа да түгэҥҥэ буойун аатын үрдүктүк туппуттара. Аны билигин Украинаҕа анал байыаннай дьайыы ыытыллыбыта үһүс сылыгар барда. Онно эмиэ биһиги буойуннарбыт хорсуннук сэриилэһэ сылдьаллар.
Саха сирин дьоно 1812 сыллааҕы Бородино кыргыһыытыттан саҕалаан Аан дойду бастакы, иккис сэриилэригэр, эйэлээх кэмҥэ Кореяҕа, Афганистаҥҥа, Чечняҕа сэриилэспиттэрэ. Оттон Уус Алдан дьоно онно сороҕор эмиэ бааллара. Аҕа дойду сэриитигэр көрдөрбүт хорсун быһыыларын иһин Владимир Лонгинов, Михаил Стрекаловскай Дьоруой сулуһун иилиммиттэрэ. Кинилэр кэннилэриттэн анал байыаннай дьайыыга хорсун быһыытын иһин Байаҕантай нэһилиэгин ыччата Алексей Неустроев Россия Дьоруойа буолбута.
Дойдуларын иһин сэриилэспиттэр албан ааттаах буойуттар буолаллар.