Бүгүн Курбуһах нэһилиэгэр, чуолаан И.В. Пухов аатын сүгэр Окоемовка сүрүн оскуолатыгар бэлиэ күн ааста. Бу туһунан улуус дьонугар-сэргэтигэр учуутал, кыраайы үөрэтээччи Геннадий Пестряков сырдатар.
– Литератураны ырытааччы, фольклорист, олоҥхону чинчийээччи, тыл билимин хандьыдаата, Саха АССР наукаларын үтүөлээх деятелэ, Гражданскай сэрии уонна Аҕа дойду сэриитин кыттыылааҕа, Кыһыл сулус уордьан кавалера Иннокентий Васильевич Пухов күн сирин көрбүт бэлиэ күнэ – бүгүн. Кини 1904 сыллаахха төрөөбүтэ.
Бу үөрүүлээх күҥҥэ И.В. Пухов пааматынньыгар сибэкки дьөрбөтүн уурдубут. Ол кэнниттэн нэһилиэкпит баһылыгын солбуйааччы Анастасия Аммосова, улуустааҕы Олоҥхо дьиэтин дириэктэрэ Марфа Алексеева эҕэрдэ тыллары эттибит.
Ону таһынан, улуустааҕы Олоҥхо дьиэтин куукуланан тыйаатыра кэлэн, уһуйаан, оскуола оҕолоругар «Күн Эрэли» олоҥхону оонньоон көрдөрдүлэр, викторина ыыттылар, хаартыскаҕа түһэн бүгүҥҥү күнү үйэтиттилэр.
И.В. Пухов аата Окоемовка сүрүн оскуолатыгар 2004 сыллаахха иҥэриллибитэ.