СӨ Бырабыыталыстыбатын бэрэссэдээтэлин бастакы солбуйааччы Дмитрий Садовников салалталаах оробуочай бөлөх атырдьах ыйын 13-15 күннэригэр илин эҥээр улуустарга кыстыкка бэлэмнэнии үлэтин көрө-истэ, билсэ үлэлиир.
Бөлөх оробуочай сырыытын бүгүн Уус Алдан улууһуттан саҕалаата. Бөлөххө тутуу миниистирэ Виктор Романов уонна да атын тустаах министиэристибэлэр үлэһиттэрэ тутуу хаамыытын, кыстыкка бэлэми көрөн-истэн, ыйыы-кэрдии оҥорон бардылар.
Бороҕоҥҥо “Альянс СПМ” ХЭТ Лонгинов аатынан уулуссаҕа тута сылдьар 36 квартиралаах дьиэтигэр сырытта. Маны сэргэ “Гарантрегион-14” ХЭТ тутааччылаах Пушкин аатынан уулуссаҕа тутулла турар 30 квартиралаах икки дьиэни, Жилой квартал 8 аадырыһыгар “Востокпромстрой” ХЭТ тута сылдьар 56 квартиралаах түөрт этээстээх дьиэтин көрдө.
Итиэннэ Бороҕон арҕаа олохтоохторун ититии ситиминэн хааччыйыахтаах тутулла турар “Запад-2” хочуолунай тутуутун көрдө-иһиттэ. Чараҥ бөһүөлэгэр эмиэ чааһынай тэрилтэ (“Экогрупп” ХЭТ) туппут хочуолунайыгар сылдьан, оробуочай сырыытын түмүктээтэ.
Дмитрий Садовников бу тутууларга үлэ графиктан хаалан иһэринэн тутааччыларга сэрэтии бэриллибитин, кэмигэр киллэрбэт түгэннэригэр улахан суумаҕа ыстарааптаныахтарын эттэ.
Ольга Шепелева