Улууспутугар иккис сылын ыытыллыбыт идэҕэ туһаайар хайысхалаах 6-13 саастаах оҕолорго аналлаах «Тук-тук, профессия» чемпионакка быйыл отучча компетенцияҕа 275 оҕо кытынна.
Ил Дархан ыйааҕар биир сүрүн хайысха быһыытынан эдэр профессионаллар хамсааһыннара – “Профессионалы (Ворлдскиллс)” бэлиэтэммитэ. Чемпионат сүрүн сыалынан үөрэнээччилэри идэҕэ туһаайыыга олук ууруу буолар.
Ааспыт үөрэх дьылыгар “Профессионалы” күрэскэ улууска 33 компетенциянан 282 оҕо хабыллан кыттыыны ылла, регионнааҕы чемпионакка уопсайа 12 оҕо улууспут аҕыс оскуолатыттан миэстэлэстэ: түөрт оҕо лауреат буолан Россияҕа кытынна, аҕыс оҕо араас таһымнаах дипломант буолан, бүтүн өрөспүүбүлүкэтээҕи рейтиҥҥэ биһиги улууспут түөрт иһигэр киирдэ (былырыын эмиэ 4-с миэстэ этэ).
Антон Тищенко учууталын Иннокентий Даниловы кытта
Ангелина Тимофеева
Айыллаана Дьячковская учууталынаан Евгения Местниковалыын
Бүтүн Россиятааҕы түһүмэххэ Москва куоракка “Кровельные работы по металлу” хайысхаҕа Лөгөй орто оскуолатын 9-с кылааһын үөрэнээччитэ Антон Тищенко үһүс бочуоттаах миэстэни ылары ситиспитэ (сал. Иннокентий Данилов); Санкт-Петербург куоракка “Эстетическая косметология” хайысхаҕа Мүрүтээҕи 1-гы №-дээх орото оскуолатын 9-с кылааһын үөрэнээччитэ Айыллаана Дьячковская «Өркөн» эбии үөрэхтээһин кииниттэн кыттыыны ылан 6-с миэстэни ылбыта (сал. Евгения Местникова); Великий Новгород куоракка «Ветеринария» компетенцияҕа Найахы орто оскуолатын 9-с кылааһын үөрэнээччитэ Ангелина Тимофеева ситиһилээхтик кыттан кэлбитэ (сал.Сахаяна Фомина, Лидия Лугинова).
Саҕаламмыт 2023-24 үөрэх дьылыгар ситиһиилэр өссө хаҥыы туралларыгар баҕарабыт.
Мария Аргунова