Дьокуускай куорат «Сэрии оҕолоро» уопсастыбаннай түмсүүтүн Сэбиэтин бэрэссэдээтэлэ, СӨ норуотун хаһаайыстыбатын үтүөлээх үлэһитэ, Уус Алдан улууһун бочуоттаах олохтооҕо Зинаида Дмитриевна Винокурова «О проблемах военного времени и задачах ООО «Дети войны»» кинигэни бэлэмнээн 2024 сылга бэчээттэтэн таһаартарда.
Кинигэҕэ түмсүү 2014-2023 сс. үлэтэ, үрдүкү салалтаҕа туруорсуулар, өрөспүүбүлүкэ хаһыаттарыгар тахсыбыт ыстатыйалар түмүллэн наарданан киирбиттэр. Олор истэригэр Курбуһах олохтооҕо Анна Винокурова «Сэрии кэннинээҕи «оҕо» санаата» диэн «Забота-Арчы» хаһыат 2015 с. тохсунньу 29 күнүнээҕи нүөмэригэр бэчээттэммит хоччоххой, тулаайах оҕо сааһын туһунан киһини долгутар суруйуута киирбит. Куоракка «Сэрии оҕолоро» уопсастыбаннай түмсүү 2014 сыл алтынньы 30 күнүгэр ыытыллыбыт бастакы тэрээһин мунньахха бигэргэммит. Сэрии ыар сылларыгар оҕо саастара ааспыт аҕа көлүөнэ дьоммут кэм кэрдии ааһан истэҕин аайы көҕүрээн иһэллэрэ олоххо баар көстүү. Күн бүгүн сэрии кэмин оҕолорун үксүлэрэ 80 саастарын ааспыт дьон. Кинилэргэ ураты болҕомто ууруллара, олохторун уһатар туһугар анал дьаһаллары ылыныы – олох ирдэбилэ.
Кинигэ түмүгэр ааптар Зинаида Винокурова ааҕааччыга туһаайан этиитигэр Улуу Кыайыы 80 сылын көрсө аҕа көлүөнэ олорон ааспыт олоҕун үөрэтиигэ, сырдатыыга, үйэтитиигэ кэскиллээх үлэ ыытыллара наадатын ыйар. Билигин Дьокуускайга 11 сэрии бэтэрээнэ, 753 тыыл үлэһитэ, 6240 сэрии кэмин оҕолоро олороллор. Оонньооботох оҕо саастаах аҕа көлүөнэ олорор усулуобуйаларын тупсарыыга болҕомто күүһүрэригэр баҕатын биллэрбит.
Кинигэ нууччалыы, сахалыы тылынан суруллубут, 216 страницалаах, тираһа 100 экземпляр.
Елена Сыроватская, уопсас. кэрэсп.