СӨ баһаары утарыы судаарыстыбаннай сулууспатын начальнига Руслан Захарович Босиков кулун тутар 29 күнүгэр таһаарбыт 514/1300 нүөмэрдээх бирикээһинэн муус устар 1 күнүттэн 30 күнүгэр диэри «Жилище» операция 1 этээбэ саҕаланна.
Операция сүрүн сыала-соруга баһаары утарыы үлэни күүһүрдүү, баһаарга хоромньу тахсыбатын туһугар үлэлэри ыытыы. Улууспутугар бастакы кыбаартал түмүгүнэн 5 баһаар бэлиэтэннэ. Былырыын 13 баһаар бэлиэтэммитэ. Баһаардар буолбут биричиинэлэрэ: оттуллар оһохтон – 2, чааһынай дьиэҕэ, баанньыкка аһаҕас уоту сэрэҕэ суох туттууттан – 1, чааһынай техника уонна техника уота замыканиелаан 1 техника эмсэҕэлээтэ. Баһаар көһүппэтэх өттүгүттэн хаһан баҕарар буолуон сөп. Хас сылын аайы чааһынай ыалларга баһаардар буолуулара аччаабат.
Ол курдук, олорор дьиэлэргэ буолар баһаардар сүрүн биричиинэлэринэн оһох турбатын тахсыыта ирдэбилгэ эппиэттээбэтиттэн, оһоҕу оттон баран хонтуруола суох хаалларыыттан, электрическэй прибору холбоон хаалларыыттан, аһаҕас уоту сэрэҕэ суох туттууттан. Баһаар үксүн олорор дьиэлэргэ уонна уһаайба иһигэр баар тас тутууларга буолар. Дьиэҕэ кыра оҕону соҕотохтуу таһыттан хатаан барар кутталлаах, төрөппүттэр оҕо тугу барытын боруобалыы сатыырын, төттөрүтүн оҥорорун умнумаҥ, кылгас да кэмҥэ хаалларыы, кыра оҕонон оһоҕу отуннарыы, хонтуруоллатыы куһаҕан түмүктээх буолуон сөбүн умнумаҥ. Дьиэттэн тахсан барарга, утуйуох иннинэ уоту-күөһү араара сылдьыҥ.
Дьиэҕитигэр бэйэ оҥорбут электрическэй прибордарын туттумаҥ. Кэмиттэн кэмигэр уот ситимин, розеткалары, предохранителлары көрөн уларытын. Билигин маҕаһыыннарга уот тэрилэ арааһа атыыга элбээтэ. Уот ситимин уларытарга провод кыамтатын көрөн ылыахха наада. Икки араас маркалаах уот проводын биир дьиэҕэ туттумаҥ. Күүстээх прибору мөлтөх розеткаҕа холбуур, биир розеткаҕа элбэх күүстээх прибордары холбуур нагрузка буолан уот ситимин уматыан сөп. Электрическэй лаампа эмиэ эстиэн сөп, эстэн фитиилэ умайар эттиккэ түстэҕинэ аҕыс да чаас буолан баран, умайыыны таһаарыан сөп.
Табах окурога эмиэ умуруорбакка бырахтахха аҕыс чааһы быһа умуллубакка сытыан сөп. Баһаар хаһан баҕар күүппэтэх өттүгүттэн буолуон сөп. Баһаар буолбутун тыаһаан биллэрэр пожарнай извещатели анал маҕаһыынтан атыылаһан туруорунаргытыгар сүбэлиибит. Баһаар буолбатын туһугар хас биирдии киһи бэйэтэ сэрэҕи тутуһуохтаах, оҕолору сэрэхтээх буоларга үөрэтиэхтээх. Ыалларга баһаарынай үлэһиттэринэн түҥэтиллэр быраабылалаах кумааҕыны көрүҥ, тутуһуҥ, оҥостуҥ диэн ыҥырабыт.
Улуустааҕы 34 №-дээх баһаарынай сулууспа