«Уус Алдан улууһа (оройуона)» муниципальнай тэриллии дьаһалтатын уонна тус бэйэм ааппыттан бу өрөгөйдөөх Өрөспүүбүлүкэбит күнүнэн итиитик-истиҥник эҕэрдэлиибин!
Муус устар 27 күнэ биһиэхэ, саха дьонугар, ураты күн. Бу күн Саха сирэ сүрүн государственнай бырааһынньыгын – Өрөспүүбүлүкэ күнүн бэлиэтиибит. Бу күн 1922 сыллаахха Саха автономнай өрөспүүбүлүкэтин тэрийэр туһунан Декрет баттаммыта, онтон 1992 сыллаахха эмиэ бу күн Саха Өрөспүүбүлүкэтин Конституцията ылыныллыбыта. Бу күн биһиэхэ, саха норуотугар, улахан, дириҥ суолталаах. Маныаха өйдөрүн-санааларын уурбут, саха норуот туһугар үлэлээбит-хамсаабыт киэн туттар дьоммут Василий Никифоров-Күлүмнүүр, Алексей Кулаковскай, Платон Ойуунускай, Максим Аммосов, Исидор Барахов, Степан Аржаков ааттара үйэлэргэ умнуллубат.
Биһиги, Уус Алдан дьоно-сэргэтэ, ыччата, кырачаан оҕолоро, саха норуота үйэлэр тухары иитиэхтээн кэлбит сырдык ыра санааларын олоххо киллэрбит, биһиги сайдыыбытыгар муҥура суох кыахтары уонна кэскиллэри арыйбыт, норуот кэскилин туһугар турууласпыт биир дойдулаахтарбытынан күн бүгүн киэн туттабыт.
Киэн туттабыт нуучча омугу кытта или түстэспит сүдү төрүппүт Лөгөй Тойонунан, “Сахалар тустарынан былааны” күн ыраахтааҕыга тиэрдибит Алексей Аржаков-Сэһэн Ардьакыабынан, Степной Думаны төрүттээччи, олохтоох бэйэни салайыныыга олук уурбут Иван Емельянович Мигалкинынан, уһулуччулаах общественнай-политическай деятель, сырдатааччы, ХIX-XX үйэлэр кирбиилэринээҕи саха национальнай интеллигенциятын бас-көс киһитэ Василий Васильевич Никифоров-Күлүмнүүрүнэн, Саха автономиятын турууласпыт дьон дьыалаларын салҕааччы, Уобаластааҕы партийнай тэрилтэ II сэкэрэтээринэн үлэлээбит Николай Николаевич Окоемовынан, саха маҥнайгы конституциятын сүрүн сокуонун оҥорсубут судаарыстыбаннай суолталаах общественнай-политическай деятель Василий Никанорович Леонтьевынан уонна да атын сүдү өбүгэлэрбитинэн.
Республика государственноһын турууласпыт саха чулуу уолаттарын уонна биир дойдулаахтарбыт турууласпыт олохторо бүгүн күргүөмнээхтик салҕанар. Быйылгы сылга Россияҕа – Дьиэ кэргэн, республикабытыгар – Оҕо саас, улууспутугар Аҕа сылларынан биллэриллибитэ. Биһиги улууспут сайдыыта, кини дьонун олоҕун уйгута хас биирдиибититтэн тутулуктааҕын быһыытынан күргүөмнээхтик үлэлиэҕиҥ, үөрэниэҕиҥ, айыаҕыҥ-тутуоҕуҥ!
Күндү дойдубут дьоно-сэргэтэ, доруобай, чөл туруктаныҥ, уйгу-быйаҥ олохтонуҥ!
Улуус баһылыга В.И. Аммосов