Историяны дьон оҥорор. Уус Алданы ааттаппыт, Саха сиригэр спорт араас көрүҥнэрин, маассабай хамсааһынын саҕалаабыт Николай Николаевич Тарскай төрөөбүтэ 100 сылын дьоно-сэргэтэ киэн тутта бэлиэтиир, кини аатыгар сүгүрүйэр. «УҺуктуу» литэрэтииринэй түмсүү (сал. Галина Аммосова) көхтөөх чилиэннэрэ, улуус үөрэхтээһинин уонна култууратын сайдыытыгар үтүөкэн өҥөлөөх Клара Троева, Ульяна Бурнашева – Уйана бүгүн Николай Тарскай төрөөбүт ытык сиригэр – Баатаҕай нэһилиэгэр ыытыллар ыһыахха кыттыһан Н. Тарскайга анабыл хоһооннорун киэҥ иһитиннэриигэ таһаарабын.
Клара Троева
Норуоппут биир сүдү киһитэ
Ньукулай Таарыскай буолбута,
Сайдыылаах саханы иитэргэ
Санаатын бүтүннүү уурбута.
Дьулуһуу, чөл турук, өй-санаа
Сирдиэҕэ баҕалаах үрдэлгэ,
Ыччакка өйөбүл, эрэнии
Тиэрдиэҕэ кэхтибэт кэскилгэ.
Дойдуга тапталтан күүс ылан,
Сиэрдээхтик, кыахтаахтык салайан,
Ситимнээх үлэни ыыппыта,
Саҥалыы хамсанан кыайбыта.
Маассабай хамсааһын сайдыыта
Норуокка туһалаах буолбута,
Саханы чыпчаалга тиэрпитэ,
Үлэтин түмүгэ дэппитэ.
Дойдута күн бүгүн айхаллыыр,
Ырата туолбутун уруйдуур,
Эдэр дьон, киэн туттуҥ кининэн,
Таарыскай диэн улуу киһинэн!
4.06.2024
***
Ульяна Бурнашева — Уйана
Эрчиллии да эрчиллии,
Эти-хааны эрчийии,
Араас албас арыллар,
Албын ньыма саҕыллар.
Ити тустуу, көҥүл тустуу,
Таарыскайбыт күрэҕэ –
Хорсун-хоодуот уолаттар,
Күрэхтэһэр күннэрэ.
Ыһыы-хаһыы, ыксаан ылыы,
Тулуй тустуук, тулуй дуу,
Кыһыл муннук, күөх муннук,
Кытаат бөҕөс, кытаат дуу.
Кыра киһи кыайыыта,
Кылам гынар эрэлбит,
Таарыскайбыт күрэҕэр,
Ситэр-хотор өрөгөй.
2024 сыл, бэс ыйа
Елена СЫРОВАТСКАЯ, уопсас. кэрэсп.