Бу дьыл кулун тутар 22 күнүгэр В.В. Никифоров – Күлүмнүүр аатынан култуура дыбарыаһыгар «Дүпсүн», Партизан Заболоцкай, Герой Егоров ааттарынан совхозтар 50 сыллаах үбүлүөйдэрин бэлиэтиир тэрээһин ыытыллара былааннанар.
Бу тэрээһини ыытыыга улууска 28 чилиэннээх хамыыһыйа тэрилиннэ. Урукку совхозтар отделениеларыттан барыта 13 нэһилиэк хабыллан бу тэрээһиҥҥэ кыттыахтара. Партизан Заболоцкай аатынан совхозтан: Лөгөй, II Лөгөй, Баатаҕай, I Өспөх нэһилиэктэрэ. «Дүпсүн» совхозтан: Дүпсүн, Чэриктэй, Найахы, Өнөр, Өспөх нэһилиэктэрэ. Герой Егоров аатынан совхозтан: Байаҕантай, II Байаҕантай, Бээрийэ, Түүлээх нэһилиэктэрэ.
– Үбүлүөйдээх тэрээһиҥҥэ 200 бэтэрээн үлэһит үс совхозтан мустуоҕа, совхоз саҕана ситиһиилээхтик үлэлээбит производство бастыҥнара чиэстэниэхтэрэ уонна үлэлэммит үлэ, ситиһиилэр тустарынан ахтан-санаан ааһыахтара. Билигин үлэлии сылдьар хаһаайыстыбалар совхоз саҕана хайдах үлэ барбытын туһунан истэн элбэххэ үөрэниэхтэрэ, үлэлэригэр туһаныахтара диэн эрэнэбит, – диэн Уус Алдан улууһун тыа хаһаайыстыбатын управлениетын кылаабынай агронома Прокопий Белолюбскай билиһиннэрдэ.
Маны тэҥэ бүгүн, олунньу 2 күнүгэр, ааспыт сыл түмүктэрин таһаараар үөрүүлээх тэрээһиҥҥэ нэһилиэктэр баһылыктара, бэрэстэбиитэллэрэ мустубуттарын туһанан улуус дьаһалтатыгар бастакы улахан тэрээһин мунньах буолла. Онно үбүлүөйдээх совхозтар оччотооҕу туруу үлэһиттэрин чиэстиир улахан тэрээһини үрдүк таһымҥа ыытарга, быйыл сайын бу совхозтар үбүлүөйдээх ыһыахтарын ыыталларыгар нэһилиэктэргэ тэрийэр хамыыһыйа анал сорудаҕы биэрдэ.