Улуустааҕы VII «Чымадааҥҥа кэллиэксийэ» бэстибээл быйыл «Мин дьиэ кэргэним оонньуурдара» тиэмэнэн ыытылынна. Манна 12 саастарыттан үөһээ саастаах оҕолорго Тулуна орто оскуолатын 6 кылааһын туйгун үөрэнээччитэ Милана Атласова I миэстэни ылан кыайыылаах аатын сүктэ.
Милана ийэтэ оскуолаҕа дириэктэри иитэр үлэҕэ солбуйааччы, саха тылын учуутала Елена Ивановна оҕо сылдьан оонньообут оонньуурдарын, дьиэ кэргэн харыстаан ууруна сылдьар бэрт интэриэһинэй, дэбигис көстүбэт малларын көрдөрүүгэ туруорда. Олор истэригэр 1974 сыллаах оҕо оонньуур иистэнэр массыыната, 1979 сыллааҕы конструктор оонньуур, сэбиэскэй кэминээҕи «Мурзилка», «Весёлые картинки», «Колокольчик» сурунааллар, сэбиэскэй харчылар бааллар. 1925 сыллааҕы 10 кэппиэйкэ болҕомтону тарта. Милана хас биирдии экспонаатын туһунан лоп бааччы сиһилии билиһиннэриитэ дьүүллүүр сүбэ үрдүк сыанабылын ылла.
Милана кыра кылаастан наар туйгуннук үөрэнэр. Дуобакка оонньуурун сөбүлүүр. Оскуолаҕа хомусчуттар «Оһуор» ансаамбылларыгар сылдьар, иллэҥ кэмигэр бисквитнэй, медовай туортары оҥорор. Бу ый 19 күнүгэр ыытыллыбыт үөрэнээччилэр улуустааҕы дуобакка күрэхтэһиилэригэр II миэстэни ылбыта. Сарсын өрөспүүбүлүкэ күрэхтэһиитигэр кытта айанныыр. Араас дьарыктаах кыысчаан өрүү инники буоларга дьулуһар.
Елена Сыроватская, уопсас.кэрэсп.