Мүрү 1-гы нүөмэрдээх орто оскуолатыгар уруһуй уонна технология учууталынан үлэлиир Валентина Лаптева тохсунньу 18 күнүгэр Суотту орто оскуолатын базатыгар ыытыллыбыт улуустааҕы эдэр учууталлар куонкурустарыгар «Методическое мастерство» номинация кыайыылааҕа буолла.
Бу куонкуруска 2018-2019 үөрэх сылыгар оскуола математикаҕа учуутала Виктория Афанасьева кыайыылаах аатын ылбыта. Быйылгы үөрэх сылыгар 5 сыл пед.стажтаах, икки үрдүк анал педагогическай үөрэхтээх эдэр учуутал Валентина Лаптева куонкурус туһунан кэпсиир:
– Куонкурус иннинэ кыттааччылар педагогикаҕа дьыктаан суруйбуппут. Оттон куонкурус күн түөрт көрүҥҥэ күрэхтэстибит. Бастаан уруок биэрбиппит. Мин «Декоративнай натюрморт» тиэмэҕэ уруокпун 6-с кылааска ыыппытым. Оҕолордуун өйдөһөн үлэлээбиппит, оҕолор харахтара уоттанан үчүгэйдик үлэлээбиттэриттэн астыммытым. Иккис түһүмэҕинэн маастар кылаастары ыытыы буолбута. «Развитие креативного мышления» тиэмэҕэ мустубут учууталларга үлэм уопутуттан кэпсээбитим. Салгыы «Вопрос учителю» түһүмэххэ кыттааччы боппуруоска эппиэттээбитэ. Бүтэһигинэн «Слово учителю» түһүмэххэ «Роль учителя в системе современного образования» тиэмэҕэ санааларбын үллэстибитим. Түмүккэ «Методическое мастерство» номинация кыайыылааҕа буоллум.
Маннык куонкурустарга кыттыы эдэр учууталларга бэйэлэрин тургутан көрүнэллэригэр, билиини хаҥатарга, ньыманы баһылыырга кыаҕы биэрэр. Куонкуруска үс ый инниттэн бэлэмнэнэн үлэбэр уопуту иҥэринним. Оскуолам завучтара Анна Артамонова, Ольга Бурцева, кэллиэгэм Наталья Павлова, «Спектр» миэтэд. холбоһук салайааччыта Виктория Афанасьева күүс-көмө, өйөбүл буоллулар. Кинилэр эмиэ бу куонкуруска кыттан үлэлэрин саҕалаабыттара. Мантан тирэҕирэн араас таһымнаах «Илин эҥэр эдэр учуутала», «Сыл учуутала», «Кылаас салайааччыта» куонкурустарга ситиһиилээхтик кыттыбыттара. Оскуола эдэр учууталларын хамаандата «Педагогическай эрэл», «Метатурнир» куонкурустарга оскуола чиэһин көмүскээбиттэрэ, хаста да кыайыылаах буолбуттара.
Валентина Петровна эйэҕэс, холку, сэмэй майгылаах, оҕолорго чугас үлэһит учуутал. 22 оҕолоох 7 «а» кылаас салайааччыта. Бэйэтэ ыал ийэтэ. Нам Партизан нэһилиэгиттэн төрүттээх. Кэргэнинээн Денис Лаптевтыын 2020 с. ыал буолбуттара. Физрук идэлээх Денис Артурович түөрт сыл оскуолаҕа тэрийээччи педагогтаабыта, билигин үөрэх управлениетыгар үлэлиир. Лаптевтар кырачаан кыыстара – «Мүрүчээнэ» уһуйаан иитиллээччитэ.
Кэрэ эйгэтигэр чугас эдэр учуутал айар-тутар, үлэлиир баҕалаах, үгүс былааннаах.
Елена Сыроватская, уопсас. кэрэсп.