Курбуһах нэһилиэгин киинигэр Уус Күөлүгэр Судаарыстыбаннас күнүгэр уонна Кыайыы 80 сылын көрсө Бүтүн Россиятааҕы «Сады России» акцияҕа кыттыһан мас, талах олортулар.
Онон бөһүөлэккэ тэрилтэлэр тастарыгар, оҕо былаһааккаларыгар барыта 80 ук үүнээйи эһиил саас силигилээн көҕөрүө. Кэлин бу мастар аттыларыгар Аҕа дойду сэриитин кыттыылаахтарын ааттара суруллубут табличкалары туруорар былааннаахтар.
– Бу аахсыйа манан тохтообот. Ким баҕалаах, хаһан баҕарар оҕо былаһааккатын, уопсастыбаннай сири тупсаран, бу бачыымы өйүөхтэрэ уонна буойуттар чугас дьонноро кэлэр сайын уу кутарга, көрөргө-харайарга көмөлөһүөхтэрэ диэн эрэллээхпит, – диэн нэһилиэк баһылыгын солбуйааччы Анастасия Аммосова иһитиннэрдэ.
Итини таһынан бүгүн Н.Н. Окоемов аатынан Курбуһах орто оскуолатыгар үөрүүлээх миитини ыыттылар, онно оскуола 11-с кылааһын үөрэнээччилэрэ уонна тэрилтэ салайааччылара биллэр общественнай-политическай деятель, биир дойдулаахтарын Николай Окоемов пааматынньыгар сибэкки дьөрбөтүн уурдулар, дьоро күнү уруйдаан оһуохайдаатылар.