“Азия оҕолоро” норуоттар икки ардыларынааҕы VIII спортивнай оонньуулар уоттарын Бороҕоҥҥо көрсөр үөрүүлээх тэрээһин буолла. Оонньуу уотун Лөгөй Тойон болуоссатыттан саҕалаан дьон-сэргэ үөрүүтүн, эҕэрдэтин үллэстэ киин уулуссанан Майаҕатта Бэрт Хара аатынан стадиоҥҥа киллэрдилэр. Эстафетаны бастакынан спорт бэтэрээнэ, Манчаары оонньууларын икки төгүллээх чемпиона, Мүрү нэһилиэгин бочуоттаах олохтооҕо Прокопий Харитонов саҕалаата.
Салгыы “Азия оҕолоро” оонньууларга буокса көрүҥэр кыттыахтаах Айсен Неустроев ылла. Бу курдук эстафета салҕанан мас-рестлиҥҥа республика, Россия чемпиона, аан дойду боруонса призера Элеонора Антонова, Олимпийскай эрэллэри бэлэмниир оскуола дириэктэрэ Иван Ноговицын, Е.Ф. Габышев аатынан оҕо спортивнай оскуолатын дириэктэрэ Михаил Слепцов, Баһылай Манчаары аатынан спорт национальнай көрүҥнэрин республикатааҕы киинин дириэктэрэ, Ил Түмэн депутата, мас-рестлинг бүтүн Россиятааҕы федерациятын бастакы вице президенэ Геннадий Васильев, СӨ үтүөлээх тренерэ, волейболга улуус сүүмэрдэммит хамаандатын старшай тренерэ Максим Аммосов, “Азия оҕолоро” оонньууларга буокса көрүҥэр кыттыахтаах Артур Дьячковскай, көҥүл тустуу көрүҥэр кыттыахтаах Максим Чачуа, буоксаҕа СӨ икки төгүллээх чемпиона, ДВФО призера, Россиятааҕы турнирдар чемпионнара Айаан Борисов, буоксаҕа “Азия оҕолоро” VI оонньуулар чемпиона, Россия чемпионатын призера, ДВФО үс төгүллээх чемпиона Петр Егоров, чэпчэки атлетикаҕа норуоттар икки ардыларынааҕы кылаастаах спорт маастара, 100 км дистанцияҕа Россия чемпиона, СӨ норуоттарын спортивнай уонна Манчаары оонньууларын призера Изабелла Борисова, көҥүл тустууга “Азия оҕолоро” IV оонньуулар чемпиона Дьулустаан Готовцев стадиоҥҥа диэри тиэртилэр. Оттон түмүктүүр биэтэккэ чэпчэки атлетикаҕа “Азия оҕолоро” оонньууларга кыттыахтаах Диана Егорова Уус Алдан улууһун баһылыгар Василий Аммосовка туттарда. Онон ытыс доҕуһуолунан оонньуулар уоттарын киин трибунаҕа Василий Иванович киллэрдэ.
Үөрүүлээх тэрээһин Россия үтүөлээх “Кэнчээри” оҕо народнай образцовай ансамбла (сал. Василий Парников) Галина Иванова тылларыгар, Станислав Луковцев мелодиятыгар “Азия оҕолоро” гимнин толорууларынан саҕаланна.
Эҕэрдэ тылы улуус баһылыга Василий Аммосов эттэ: «Тойон Мүрү туонатыгар “Азия оҕолоро” VIII спортивнай оонньуулар уоттарын көрсөр үөрүүлээх кэм улууспутугар спорт эйгэтигэр үгүс бэлиэ түгэннэрдээх буоларынан киэн туттабыт. Ол курдук саха омугун физкультураҕа уонна спорка угуйбут улууканнаах салайааччыбыт, государственнай уонна общественнай деятель, биир дойдулаахпыт Николай Тарскай төрөөбүтэ 100 сыла, Парижка ыытыллар Олимпиадаҕа Уус Алдан улууһун көҥүл тустууга оскуолатыттан Арыйаан Тютрин, Виктор Рассадин кытталлар. Быйылгы “Азия оҕолоро” спортивнай оонньууларга улууспутуттан 6 оҕо буоксаҕа, чэпчэки атлетикаҕа, греко-римскэй тустууга, тхэквондоҕа кыттар чиэһи ылан, улуустарын чиэһин көмүскүөхтэрэ. Онон биһиги Николай Николаевичпыт саха омугу физкультураҕа, спорка сыһыаран, инникини өтө көрөн, киэҥ эйгэҕэ, аан дойдуга биллэр спортсменнар буолуохпут диэн эппитэ туолбутунан киэн туттабыт”.
Салгыы үөрүүлээх историческай күнүнэн тус бэйэтин, Ил Түмэн уонна СӨ спорка уонна физкультура министиэристибэтин аатыттан эҕэрдэ тылы Геннадий Васильев эттэ. Прокопий Харитонов “Азия оҕолоро” оонньуулар уоттарын эстафетатыгар кыттыбытыттан дьоллооҕун үллэһиннэ. Итиэннэ Уус Алдаҥҥа оонньуулар уоттарын тиэрдибит Владислав Алексеев улуус олохтоохторугар эҕэрдэтин уонна улуус баһылыгар Василий Аммосовка оонньуулар уоттарын сувенирнай факелын бэлэх уунна.
Ольга ШЕПЕЛЕВА