«Сыл түмүктэрэ» үөрүүлээх тэрээһиҥҥэ Уус Алдан улууһун баһылыга Василий Аммосов улуустааҕы киин балыыһа иккис уочаратын тутууга бырайыактыыр-сметалыыр үлэҕэ анаан быйыл үп көрүллүбүтүн туоһулуур бирикээс баттаммытын иһитиннэрбитэ. Ону чопчулаатахха, бу үлэҕэ 12 523 580 солкуобай көрүллүбүт.
Онон сменаҕа 104 киһини көрөр поликлиникалаах 11 куойкалаах эбии тутуу бырайыагын, сметатын оҥоруу түһүмэҕэ саҕаланан, уус алданнар өр күүппүт тутуубут саҕаланыаҕа.
Санатан эттэххэ, Г.Г. Никифоров аатынан Уус Алданнааҕы киин балыыһа дьиэтин бастакы уочарата сменаҕа 150 киһини көрөр поликлиникалаах 50 куойкалаах комплекса 2015 сыллаахха тутуллан үлэҕэ киирбитэ.
Өссө биир улахан тутууну – улуус киинигэр Бороҕоҥҥо уунан хааччыйыы ситимин – бырайыактыыр-сметалыыр үлэҕэ 17 125 600 солкуобай көрүлүннэ.
Итини таһынан Лөгөй нэһилиэгэр Кэптэнигэ спортивнай саала тутулларыгар бу күннэргэ бырайыак-смета докумуонун оҥорорго куонкурус түмүктэннэ, бу үлэҕэ 9 826 000 солкуобай көрүллүбүтэ.