Уус Алдаҥҥа үөрэх үлэһиттэрин олунньу ыйынааҕы мунньахтарын чэрчитинэн улууска үөрэх тэрилтэлэригэр Үөрэх хаачыстыбатын үрдэтии сылын үөрүүлээх быһыыга-майгыга арыйдылар.
Эҕэрдэ тылын этэн туран, улуус дьаһалтатын баһылыгын солбуйааччы Анатолий Сторожев үүнэр көлүөнэни иитиигэ-үөрэтиигэ өр сыллаах, үтүө суобастаах үлэтин иһин РФ үөрэхтээһинин бочуоттаах үлэһитэ ааты Егор Габышев аатынан Оҕо спортивнай оскуолатын тренер-преподавателигэр Андрей Федоровка, СӨ үөрэххэ уонна наукаҕа министерствотын бочуотунай грамотатын Дмитрий Оллонов аатынан Түүлээх орто оскуолатын дириэктэри иитэр-үөрэтэр үлэҕэ солбуйааччыта Нария Ивановаҕа, Иосиф Портнягин аатынан Сыырдаах орто оскуолатын педагог-психологар Наталья Антоноваҕа, СӨ үөрэххэ уонна наукаҕа министерствотын махтал суругун Баатаҕайдааҕы «Күнчээн» оҕо тэрилтэтин иитээччитэ Сардаана Ядрихинскаяҕа туттарда.
Салгыы эҕэрдэ тылы үөрэх салалтатын начаалынньыга Степан Литвинцев эттэ. Кини икки күннээх сүбэ мунньахха 397 киһи кыттыыны ылбытын, манна үөрэҕи тупсарыыга элбэх ырытыһыы, санаа атастаһыыта тахсыбытын эттэ. Кулун тутар ыйга норуот педагогикатыгар аналлаах форум, муус устарга хас биирдии оскуола инники үлэтин, сайдыытын торумун хамыһыйа иннигэр көмүскүөҕүн санатта. Быйылгы сылга улууска тэриллибит методическай холбоһуктар салайааччыларын эбии хамнастаан туран, бу холбоһуктары күүскэ үлэлэтэр соруктаахтарын, ол үөрэх хаачыстыбатын үрдэтиигэ биир сүрүн оруолу оонньуоҕун туһунан эттэ. Ол кэннэ талыллыбыт методическай холбоһуктар салайааччыларыгар дастабырыанньаны туттарда.
Салгыы үөрэх хаачыстыбатын үрдэтии сылын логотибын толкуйдаан оҥорууга биллэриллибит күрэс түмүгүнэн кыайыылаах тахсыбыт Курбуһах орто оскуолатын 11-с кылааһын үөрэнээччитэ Алгыс Аммосов үрдүк сыанаҕа тахсан логотибы Степан Моисеевичка дохсун ытыс тыаһын ортотугар туттарда, оттон үөрэх начаалынньыга баҕа санаатын анаан туран кыайыылаах уолга сэмэй бэлэҕин туттарда. Үөрүүлээх тэрээһини үөрэх эйгэтин талба талааннаах үлэһиттэрэ, үөрэнээччилэрэ ылбаҕай ырыаларынан, үҥкүүлэринэн киэргэттилэр.
Мария Аргунова