Уус Алдаҥҥа улуус баһылыгын Василий Аммосов дьаһалынан бүгүн Ресурснай киин арылынна. Ол чэрчитинэн бастакы тэрээһин «Уус Алдан улууһугар гражданскай өрөбүллэр» диэн икки күннээх семинар саҕаланна. Манна улууспут нэһилиэктэрин бары тэрилтэлэриттэн 70-ча киһи кэллэ.
Улууспутугар саҥа киин арыллыбытын туһунан, киин сыалын-соругун улуустааҕы кииннэммит бибилэтиэкэ тиһигин методиһа Феврония Федорова уонна култуура салалтатын начаалынньыгын солбуйааччы Саина Стручкова иһитиннэрдилэр.
Ол курдук, Ресурснай киин кииннэммит бибилэтиэкэ иһинэн үлэлиир буолуоҕа. Бибилэтиэкэ иһинэн специалистар бөлөхтөрө тэриллэн, улууспут түмсүүлэрин уонна биирдиилээн дьон көҕүлүүр бырайыактарын, о.э. гражданскай инициативаны өйүүр сыаллаах киирбит бырайыактары түмэн, сыаналаан, туһуламмыт сиригэр ыытарга үлэлэһиэхтэрэ. Ону таһынан өрөспүүбүлүкэҕэ биллэриллэр граннаах куонкурустарга дьону кытта ыкса сибээстээхтик үлэлэһиэхтэрэ.
Семинар-тренинг кыттыылаахтара икки күн устата грант усулуобуйатын анаарарга, докумуону, бырайыагы оҥорорго, хайдах киирсэргэ үөрэниэхтэрэ. Кинилэри СӨ Ыччат дьыалатыгар уонна социальнай коммуникация министиэристибэтин, гражданскай уопсастыбаны кытта алтыһар салаатын исписэлииһэ Дмитрий Куприянов үөрэтэн саҕалаата. Оттон сарсын бырайыактаах дьону кытта көрсөн сүбэ-ама биэриэхтэрэ.
Мария Аргунова