Бүгүн Бороҕоҥҥо “Идэһэ–2023” дьаарбаҥка ыытыллан, үгүс кэлии-барыы, сүпсүлгэнэ буолла. Улуус киинигэр Лөгөй, Мүрү, Өнөр, Чэриктэй, Бэрт Ууһун, Найахы, Баатаҕай, Суотту, II Байаҕантай, Дүпсүн, II Лөгөй, I Өспөх нэһилиэктэриттэн тэрээһиннээх уонна кэтэх хаһаайыстыбалар үрүҥ ас, эт, балык, отон, о.д.а. ас эгэлгэтин барыта 32 атыылааччы киллэрэн, хамаҕатык атыылаата.
Маныаха ас арааһын, үгүһүн атыылаабыт хаһаайыстыбалар анал номинацияларынан бэлиэтэннилэр. “Тыа хаһаайыстыбатын кооперативтарын уонна оҥорон таһаарааччыларын бастыҥ кыттыылааҕа” номинация кыайыылааҕынан “Найахы” ТХПК буолла. Иккис – “Дүпсүн” ТХППК, “Мүрү-агро” тыа хаһаайыстыбатын бородууксуйатын оҥорон таһаарар, хааччыйар, батарар потребительскай кооператива.
“Коллективнай-фермерскэй хаһаайыстыбалар икки ардыларыгар бастыҥ кыттааччы”: 1 миэстэ – Мария Лукачевская (Өнөр нэһилиэгэ), 2 миэстэ – Иван Сивцев (Мүрү нэһилиэгэ), 3 миэстэ – Михаил Алексеев (Бороҕон нэһилиэгэ).
“Кэтэх хаһаайыстыбалаах бастыҥ кыттааччы” номинацияҕа Тамара Тарабукина (II Байаҕантай нэһилиэгэ) кыайыылааҕынан ааттанна. Иккис миэстэни Виталий Атласов (I Өспөх нэһилиэгэ), үсүһү Айталина Нафанаилова (Лөгөй нэһилиэгэ) ылары ситистилэр.
Быйыл нэһилиэнньэ, тыа хаһаайыстыбатын салаатын тустаах үлэһиттэрэ да бэлиэтииллэринэн, эт ас дэлэйбит. Эт буут, хол өттө диэн 650-750 солкуобайга диэри халбаҥныыр. Миэстэнэн атыыласпыттар эттэрин тута эрбэттэрэн, куулунан сүгэн бараллара олус табыгастаах буолла. Онон улуус киинин олохтоохторо кыстыыр эттэрин-астарын булунан, олус астынан тарҕастылар. Итиэннэ мантан киэһэ сибиэһэй эт минин тото-хана сырылаччы сыпсырыйар буолуохтаахтар.
Ольга Шепелева