Уус Алдан улууһа өбүгэ саҕаттан суон сурахтаах кус быһый, күрүлүүр күүстээх дьоннооҕунан биллэрэ. Бүгүн улууспутугар икки төгүл үөрүүлээх бэлиэ күн буолла. Арассыыйа Дьоруойун чиэстиир тэрээһин кэнниттэн улууспут килбэйэр киинигэр элбэх хайысхалаах спорт дыбарыаһа арылынна.
Бу 8000 кв. м. иэннээх Николай Тарскай аатынан баараҕай спорт дыбарыаһа «Демография» национальнай федеральнай, СӨ “Спорт – норма жизни” региональнай бырайыактарынан тутулунна.
Үөрүүлээх түгэҥҥэ бэлиэ күлүүһү “РусСтрой-89” хааччахтаммыт эппиэттээх тэрилтэ салайааччыта Павел Ефремов Егор Габышев аатынан Оҕо спортивнай оскуолатын дириэктэригэр Дмитрий Готовцевка туттарда.
Спорт дыбарыаһын арыллыытын аалай лиэнтэтин улуус баһылыгын дуоһунаһыгар кандидат Алексей Федотов, СӨ Бырабыытылыстыбатын бэрэсэдээтэлин солбуйааччыта Сергей Местников, СӨ Судаарыстыбаннай Мунньаҕын (Ил Түмэн) бэрэссэдээтэлин бастакы солбуйааччы Александр Жирков, СӨ физическэй култуураҕа уонна успуорка миниистирэ Леонид Спиридонов, СӨ тутууга миниистирэ Павел Кылатчанов, хайыһарга ССРС спордун маастарыгар кандидат, Арассыыйа уонна СӨ спордун ветерана Иннокентий Мигалкин, чэпчэки атлетикаҕа өрөспүүбүлүкэ призера, илин эҥээр улуустар чөмпүйэнээттэрин кыайыылааҕа, Мүрү 1-гы №-дээх орто оскуолатын 6-с кылааһын үөрэнээччитэ — СӨ үтүөлээх тренерэ Серафим Татаринов иитиллээччитэ Ира Сивцева быстылар.
Үөрүүлээх түгэҥҥэ Алексей Федотов спорт уораҕайа үлүскэн ымпыктаах-чымпыктаах үлэнэн үс сыл тутуллан үөрүүлээх күммүт үүммүтүнэн эҕэрдэлээн, от ыйыгар Амма улууһугар буолан ааспыт доруобуйаларынан хааччахтаах дьон “Дьулуур” өрөспүүбүлүкэтээҕи 14-с спартакиадаҕа улууспутун 47 спортсмен чиэстээхтик көмүскээбитин санатан туран, ситиһиилээх спортсменнарга Саргылан Семеновка, Алина Заболоцкаяҕа, Виктория Афанасьеваҕа, Александра Алексееваҕа улуус дьаһалтатын аатыттан харчынан бириэмийэлээх махтал суруктары туттарда.
Салгыы Сергей Местников, Александр Жирков, Леонид Спиридонов эҕэрдэлээн тыл эттилэр, спорка ситиһиилээх, кылааттаах дьоммутун наҕараадалаатылар.
Бу үөрүүлээх тэрээһини улууспут култууратын үлэһиттэрэ уонна эстрада тыйаатырын ырыаһыттара ылбаҕай ырыаларынан киэргэттилэр.
Мария Аргунова