Уус Алдаҥҥа бастыҥ эдэр учууталынан Саргылаана Федорова ааттанна

Суотту орто оскуолатыгар тохсунньу 17 күнүгэр улуус оскуолаларыттан аҕыс эдэр учуутал сылын аайы ыытыллар «На ступеньках роста» улуустааҕы куонкуруска кыттан бэйэлэрин билиһиннэрдилэр. Куонкурус 5 түһүмэхтэн турбута, онно барытыгар үчүгэйдик кыттан Мүрү 1 нүөмэрдээх орто оскуолатын саха тылын, литэрэтиирэтин эдэр учуутала Саргылаана Федорова абсолютнай кыайыылаах аатын сүктэ.

Эдэр учуутал ХИФУ Хотугулуу-илиҥҥи норуоттар тылларын уонна култуураларын үөрэтэр институтун 2022 сыллаахха бүтэрбитэ. Оскуолаҕа үһүс үөрэх сылын учууталынан айымньылаахтык үлэлиир, 23 оҕолоох 6 «а» кылаас салайааччыта. Тылга дьоҕурдаах эдэр учуутал аангылыйа тылын, атын омуктар култуураларын интэриэһиргээн үөрэтэр. Сахалыы айымньыларга сыанка, испэктээк сынаарыйын суруйуунан дьарыктанар. Оскуола үгүс тэрээһинигэр ыытааччы буолар.

Куонкурус уруогу ыытыы түһүмэҕэр Саргылаана Андреевна 11-с кылааска С.П. Данилов «Сүрэх тэбэрин тухары» арамаанынан «Олох сирдьит сулустара» диэн уруогу ыытан дьүүллүүр сүбэ биһирэбилин ылбыт. «Үөрэнээччилэрдиин кэпсэтии» түһүмэххэ ордук аһыллан кытынным диэн этэр. Бу түһүмэххэ кыттааччылар жребийинэн тиэмэни талбыттар. Саргылаана Андреевнаҕа «Во мне продолжается история моей семьи» диэн оҕолорго да, бэйэтигэр да чугас тиэмэ түбэспит. Уруогу ыыппыт 11-с кылааҺын оҕолоро бу түһүмэххэ актыыбынайдык үлэлээбиттэр, учууталы өйөөбүттэр, ол түмүгэр ситимнээх кэпсэтии тахсыбыт.

Куонкурус түмүгүнэн Саргылаана Федорова «Бастыҥ интернет-ресурс» уонна «Бастыҥ уруок» номинацияларга кыайар чиэскэ тиксибит. Түмүккэ үөһээ этиллибитин курдук куонкурус абсолютнай кыайыылааҕынан ааттанан, кулун тутарга Аммаҕа ыытыллар «Илин эҥээр эдэр педагога» куонкуруска улууһун чиэһин көмүскүү барыаҕа.

Эдэр учууталга оскуола «Лингва» мэтэдьиичэскэй холбоһуга, биирдиилээн уопуттаах да, эдэр да учууталлар, педагогтар көмө-тирэх буоллулар. Саргылаана Андреевна хас биирдии көмөлөспүт, сүбэлээбит кэллиэгэлэригэр, оскуола администрациятыгар истиҥник махтанар. Эдэр учууталга идэтин таһымын салгыы үрдэтинэн үүнэн-сайдан иһэригэр баҕарабыт.

Елена Сыроватская, уопсас. кэрэсп.