Бүгүн Уус Алдан улууһугар Педагог уонна настаабынньык сылын түмүктүүр үөрүүлэх тэрээһин быйыл үлэҕэ киирбит Мүрү 2-с №-дээх орто оскуолатыгар буолла. Оскуолалар, оҕо саадын үлэһиттэрэ, үөрэхтээһин бэтэрээннэрэ түмсэннэр түбүктээх сылы түмүктүүр тэрээһиҥҥэ кытыннылар. Үөрэх тэрилтэлэрэ быыстапкаларын туруордулар, бэтэрээннэр саҥа киэҥ-куоҥ оскуоланы сэҥээрэ көрдүлэр-иһиттилэр.
Тэрээһин үөрүүлээх чааһыгар улуус баһылыга Василий Аммосов 2023 сыл дойдубутугар Педагог уонна уһуйааччы, өрөспүүбүлүкэбитигэр Үлэ, улууспутугар Инфраструктура сайдыытын сыллара биллэриллэн, үлэ-хамнас бу эйгэҕэ туһуланан үгүс ситиһиилэрдээх ыытыллыбытын бэлиэтээтэ. Чуолаан үөрэхтээһин эйгэтигэр иитиллээччи, үөрэнээччи, педагог, бүттүүн коллективтар ситиһиилэриттэн саҕалаан, үөрэхтээһиҥҥэ саҥа киириилэри ылыммыппытын, инники соруктар туһунан киэҥ дакылааты оҥордо.
Этиитин түмүгэр улууспут үөрэхтээһинэ инники күөҥҥэ тахсарын туһугар бары сомоҕолоһон, биир киһи курдук үлэлиирбит-хамсыырбыт ирдэнэрин эттэ, ситиһиилэри баҕарда.
Итиэннэ республикатааҕы уонна бүтүн Россиятааҕы куонкурустар кыайыылаахтарыгар уонна лауреаттарыгар махтал суруктары, РФ үөрэхтээһиҥҥэ министиэристибэтин наҕараадаларын туттарда.
Үөрэх управлениетын начальнига Степан Литвинцев: «Үөрэх эйгэтигэр 2024 сылы Үөрэх хаачыстыбатын сылынан биллэрэбит. Итиэннэ бастыҥ оскуола 1 мөлүйүөн солкуобайынан наҕараадаланыаҕа. Иккис көрдөрүүлээх – 700, үһүс 500 тыһыынча солкуобайынан бириэмийэлэниэхтэрэ.
Маны сэргэ үрдүк көрдөрүүлээх үлэлэрин, ситиһиилэрин уонна кэнчээри ыччаты иитиигэ кылааттарын иһин оскуола иннинээҕи, уопсай үөрэхтээһин, эбии үөрэхтээһин эйгэтин, идэлээх сойуустар тэрилтэлэрин бастыҥнарыгар сыллата анал номинацияларга бастыҥнар быһаарыллар буолуохтара», – диэн иһитиннэрдэ.
Мантан салгыы бу биллэриллибит анал номинациялар бастакы хаһаайыттара – үөрэх эйгэтин 20 бастыҥа наҕараадаларын үөрүүлээх быһыыга-майгыга туттулар.
Оскуола иннинээҕи үөрэхтээһиҥҥэ:
- “Оскуола иннинээҕи үөрэхтээһин тэрилтэтин бастыҥ салайааччыта” – “Сардаана” оҕо тэрилтэтин салайааччыта Альбина Борисова;
- “Идэтигэр бэриниитин иһин” – Арыылаах бөһүөлэгин “Кэнчээри” оҕо саадын сэбиэдиссэйэ Аграфена Бурнашева;
- “Бастыҥ бас иитээччи” – Бороҕоннооҕу “Мүрүчээнэ” оҕо тэрилтэтин бас иитээччитэ Анна Алексеева;
- “Бастыҥ иитээччи” – Бороҕоннооҕу “Мичил” оҕо саадын иитээччитэ Любовь Прибылых;
- “Бастыҥ педагог” – “Кэскил” оҕо саадын физкультураҕа инструктора Лаврентий Тарскай.
Эбии үөрэхтээһин эйгэтигэр:
- “Эбии үөрэхтээһин тэрилтэтин бастыҥ салайааччыта” – “Өркөн” оҕону эбии үөрэхтээһин киинин дириэктэрэ Яков Колодезников;
- “Эбии үөрэхтээһин бастыҥ педагога” – Бороҕоннооҕу эдэр натуралистар станцияларын педагога Алексей Винокуров.
Уопсай үөрэхтээһин эйгэтэ:
- “Оскуола бастыҥ дириэктэрэ” – Лөгөй орто оскуолатын дириэктэрэ Михаил Пухов;
- “Иитэр-үөрэтэр үлэҕэ дириэктэри бастыҥ солбуйааччы” – Мүрү 2№-дээх орто оскуолатын дириэктэрин солбуйааччы Наталья Жураховская;
- “Иитэр үлэҕэ дириэктэри бастыҥ солбуйааччы” – Бэйдиҥэ орто оскуолатын дириэктэрин солбуйааччы Туйаара Говорова;
- “Социальнай-психологическай арыаллааһын бастыҥ специалиһа” – Мүрү 1№-дээх орто оскуолатын педагог-психолога Лена Исакова.
- “2023 сыллаах БКЭ түмүгүнэн бастыҥ көрдөрүүлээх” – Дүпсүн орто оскуолатын математикаҕа уонна информатикаҕа учуутала Петр Михайлов, Өнөр орто оскуолатын историяҕа уонна обществознаниеҕа учуутала Лена Дьяконова, Түүлээх орто оскуолатын нуучча тылыгар уонна литературатыгар учуутала Замира Кириллина, Лөгөй орто оскуолатын нуучча тылыгар уонна литературатыгар учуутала Александра Копырина.
- “Талааннаах оҕолору кытта үлэҕэ бастыҥ ситиһиилээх” – Сыырдаах орто оскуолатын химияҕа уонна биологияҕа учуутала Лариса Черкашина, Мүрүтээҕи уолаттар гимназияларын изоҕа, черчениеҕа учуутала Александра Колодезникова, Лөгөй орто оскуолатын саха тылыгар уонна литературатыгар учуутала Валентина Тищенко, Лөгөй орто оскуолатын технологияҕа учуутала Иннокентий Данилов.
- “Алын сүһүөх кылаастар бастыҥ учууталлара” – Тумул орто оскуолатын учуутала Варвара Петрова.
- Идэлээх сойуустар хамсааһыннарын эйгэтигэр Тулуна бөһүөлэгин “Татыйык” оҕо саадын, оҕо спортивнай оскуолатын уонна Сыырдаах орто оскуолатын алын сүһүөх тэрилтэлэрэ бастыҥнарынан ааттаннылар.
Ольга Шепелева