Уус Алдан улууһун делегацията СВО байыастарыгар аадырыстаммыт баһыылкалары тиэртэ

Уус Алдан улууһун баһылыгын солбуйааччы Анатолий Сторожев салайааччылаах делегация Дьокуускайтан тохсунньу 17 күнүгэр СВО территориятыгар биир дойдулаах байыастарбытын көрсө, дойдуларыттан баһыылкалары тиэрдэ айаннаабыта.

Бу күннэргэ улуус делегацията ДНР территориятыгар Новоазовск куоракка Саха сирин Биир кэлим координациялыыр киинигэр баазаланан, Мариуполь куоракка, Восточнай полигоҥҥа уонна Ялтаҕа сылдьан байыастары кытары көрүстүлэр. Кинилэргэ улуус олохтоохторо, тэрилтэлэрэ, уопсастыбаннай түмсүүлэр, нэһилиэктэр бэлэмнээбит маскировочнай сеткаларын, блиндажнай чүмэчилэри, харысхаллары, саха быһахтарын, улуус фондатыттан үбүлэммит комплект таҥастары, туттар маллары уонна чугас дьоно ыыппыт бородуукталарын туттардылар.

Саллаат уолаттарбыт, эр дьоммут дойдуларыттан үтүө илдьиттэри тутан махтаннылар. Өйөбүл буолар улуус делегацията СВО байыастарын кытары тохсунньу бүтүөр диэри көрсүөхтэрэ.