Тоҕус Геройдаах Уус Алдан улууһугар Аҕа дойду Геройдарын күнүн тэрээһиннэрэ Бороҕоҥҥо Геройдар аллеяларыгар миитинтэн саҕаланна. Бу күн күндү ыалдьытынан Россия Үлэҕэ Геройа Михаил Готовцев кэллэ. Миитиҥҥэ улуус баһылыга Василий Аммосов, бэтэрээннэр улуустааҕы сэбиэттэрин бэрэссэдээтэлэ Олег Федоров, улууска Бастыҥнар хамсааһыннарын бэрэссэдээтэлэ Г.В. Егоров аатынан Мүрү 1-гы N-дээх орто оскуолатын үөрэнээччитэ Эрсан Готовцев эҕэрдэ тылларын эттилэр.
Геройдар күннэрин бэлиэтиир үөрүүлээх тэрээһиҥҥэ үлэ бастыҥнарыгар Геройдарбыт ааттарынан бириэмийэлэри туттарыы үгэс буолбут түгэнэ В.В. Никифоров-Күлүмнүүр аатынан “Тойон Мүрү” култуура дыбарыаһын үрдүк сыанатыгар түстэннэ.
Сыл устата таһаарыылаах үлэ холобурун көрдөрөн, Үлэ Геройа Данил Бурцев аатынан бириэмийэни Мүрү нэһилиэгин дьаһалтатын юридическай боппуруостарга кылаабынай специалиһа Розалия Петухова, Социалистическай үлэ Геройа Елизавета Бурцева аатынан бириэмийэни Суоттутааҕы врачебнай амбулатория педиатр бырааһа Екатерина Саввина, Гражданскай сэрии Геройа Гаврил Егоров аатынан бириэмийэни И.Н. Жирков аатынан Дүпсүн орто оскуолатын учуутала Ольга Протопопова, РФ Үлэҕэ Геройа Михаил Готовцев аатынан бириэмийэни Олимпийскай эрэллэри бэлэмниир Бороҕоннооҕу спортивнай оскуола Уһун Күөллээҕи филиалын мас-рестлиҥҥэ тренерэ Семен Олесов, Сэбиэскэй Союз Геройа Владимир Лонгинов аатынан бириэмийэни “Технопрофи” ХЭТ дириэктэрин солбуйааччы Алексей Калинов, Россия Геройа Алексей Неустроев аатынан бириэмийэни “Волонтеры-Саха” общественнай-добровольческай түмсүү волонтера (Москва к.) Тулунаттан төрүттээх Мария Алексеева, Социалистическай Үлэ Геройа Анастасия Копырина аатынан бириэмийэни Хоро нэһилиэгин бочуоттаах олохтооҕо Михаил Копырин, Социалистическай Үлэ Геройа Николай Бурнашев аатынан бириэмийэни Байаҕантай нэһилиэгин фермерэ, урбаанньыт Василий Готовцев, РФ Геройа Михаил Стрекаловскай аатынан бириэмийэни полиция капитана, Россия ИДЬМ Уус Алданнааҕы отделын холуобунай ирдэбил бөлөҕүн старшай оперуполномоченнайа Александр Березкин уонна 6 бойобуой уордьан кавалера Дмитрий Оллонов аатынан бириэмийэни Мүрү 2-с №-дээх орто оскуолатын 11-с кылааһын үөрэнээччитэ Дьулусхан Сивцев туттулар.
Үөрүүлээх тэрээһиҥҥэ Үлэ Геройа Михаил Готовцев, улуус баһылыга Василий Аммосов, бэтэрээннэр улуустааҕы Сэбиэттэрин бэрэссэдээтэлэ Олег Федоров эҕэрдэ тыллары эттилэр, Аҕа дойду Геройдарын күнүн бэлиэтиир тэрээһин суолтата сылтан-сыл үрдээн, кэнчээри ыччаты патриоттуу тыыҥҥа иитии хайысхата кэҥээн иһэрин бэлиэтээн, үйэттэн ордук кэм устата – Гражданскай сэрии Геройа Бартыһаан Дьөгүөрэптэн саҕалаан Украинаҕа буола турар байыаннай дьайыыга хорсун быһыыны көрдөрөн Россия Геройа буолбут Алексей Неустроевка тиийэ – дойдуга бэриниилээх буолуу, бэйэни харыстаммат күүрээннээх үлэни көрдөрбүт холобурдарын, чулуу дьоммутун өрө тутан, кинилэр суолларын батыһан чиэстээхтик үлэлиэххэ, айыахха-тутуохха, сиэрдээхтик олоруохха, төрөөбүт дойдубутун, тыа сирин сайыннарыахха диэн ыҥырдылар. Оттон улууспут нэһилиэктэригэр быйылгы сыл устата туох үлэ-хамнас ыытыллыбытын, туох ситиһии кэлбитин туоһулуур рапордарын нэһилиэктэр баһылыктара улуус баһылыгар туттарыылара эмиэ биир ураты түгэн буолла. Улуус баһылыга Василий Аммосов Россия воздушнай-космическай флотун киин аппараата Советскай Союз Геройа Юрий Гагарин төрөөбүтэ 90 сылынан оҕолорго анаан ыыппыт “Мирное небо России” Бүтүн Россиятааҕы уруһуй куонкуруһугар “Герои нашего времени” номинациятын 2-с уонна 3-с степеннээх лауреат буолбуттарын туоһулуур дипломнары Бороҕоннооҕу оҕо искусство оскуолатын, Мүрү 1-гы №-дээх орто оскуолатын үөрэнээччилэригэр Айыына Крыловаҕа уонна Сайаана Москвитинаҕа туттарда.
Бу өрө көтөҕүллүүлээх үөрүүлээх тэрээһини Геройдардаах нэһилиэктэр эҕэрдэ нүөмэрдэрэ киэргэттилэр: Тандатааҕы “Дьиэрэй” эр дьон народнай ансаамбыла Герой Лонгинов туһунан саҥа ырыаны толордо, Өнөртөн “Дьүөгэ”, Курбуһахтан “Ньургуһун” ансаамбыллар, Түүлээхтэн Станислав Иванов, Хороттон Чараҥ орто оскуолатын үөрэнээччилэрэ уонна Лөгөйтөн “Чэчир” оҕо саадын “Талба” ансаамбыла ыллаатылар.
Диана Седалищева