Атырдьах ыйын 12-с күнэ – Ыччат аан дойдутааҕы күнэ. Кэлэр кэми салайса, сайдыылаах олоҕу тэлээри үөрэх-билии суолун сомсо сылдьар устудьуон ыччаппытыттан сайыҥҥы сынньалаҥнарын хайдах атаара сылдьалларын, туох саҥаны, сонуну билбиттэрин ыйыталастыбыт.
Виктория Алексеева, ХИФУ Математика уонна информатика институтун 2-с кууруһун устудьуонката (Дүпсүн нэһилиэгэ):
– Практика ааһа сылдьабын, лааҕыр оҕолорун компьютерынан хайдах туттарга үөрэтэбин. Ону тэҥэ, «ЗЕМА» Саха сирин устудьуоннарын түмсүүтэ абитуриеннарга уонна устудьуоннарга анаан номнуо иккис сылын үлэлэтэр лааҕырыгар тэрийээччинэн үлэлии сылдьабын. Дьону кытта биир тылы буларга, туох баар дьыалаҕа, үлэҕэ сымсатык, харса суох ылсан иһэргэ үөрэнним.
Айыына Нестерова, ХИФУ Инженернэй-техническэй институтун 2-с кууруһун устудьуонката (Дүпсүн нэһилиэгэ):
– Быйылгы практикабар сири, эбийиэктэри мээрэйдээн үлэлээтим. От ыйыгар Ржевка Уһук Илиҥҥи байыаннай-патриотическай вахтаҕа сырыттым. Ржевтээҕи кыргыһыы буолбут сиригэр баран окуопалары хаһан саллааттар уҥуохтарын хостоотум, медальоннарын булан ааттарын, хантан төрүттээхтэрин быһаардыбыт. Уонна бу Дьокуускайга кэлэн «SАЙДАР САМР» лааҕырга тэрийээччинэн үлэлии сылдьабын. Быйыл сайын устата элбэххэ үөрэнним, үлэҕэ элбэх уопуту ыллым.
Арсен Кривошапкин (Найахы нэһилиэгэ):
– Саха промышленнай техникумҥа сварщик идэтин бүтэрэн, ХИФУ-га Автодорожнай факультекка киирдим. Быйыл саас практикам Дьокуускайга ааспыта, соруйбут үлэлэрин барытын толорбутум. Дойдубар баран оттообутум уонна бу билигин «SАЙДАР САМР» диэн лааҕырга баһаатайынан үлэлии-хамсыы сылдьабын.
Дьулус Бочкарев, Дьокускайдааҕы Медицинэ кэллиэһин 2-с кууруһун устудьуона (Курбуһах нэһилиэгин Ус уКүөлэ):
– Дойдубар уобаластааҕы балыыһаҕа практикаламмытым. «Сайыҥҥы үлэ сезона» диэн устудьуоннар этэрээттэригэр үлэлээбитим, ол кэннэ дойдубар оттоотум. Билигин «SАЙДАР САМР» лааҕырыгар тэрийээччинэн үлэлии сылдьабын. Бу сайын иһигэр уопсастыбаннай үлэ-хамнас эйгэтигэр элбэҕи биллим, үөрэнним.
Юра Барабанскай (I Өспөх нэһилиэгин Уһун Күөл бөһүөлэгэ):
– Быйыл Дьокуускайдааҕы култуура уонна ускуустуба кэллиэһин бүтэрдим уонна үрдэтинэр санааттан ХИФУ-га Хотугу норуоттар тылларын, култуураларын үөрэтэр институкка (ИЯКН) туттарсан үөрэххэ киирдим. Үөрэхпэр практика ааспатаҕым, ол оннугар Туймаада ыһыаҕар режиссер көмөлөһөөччүтүнэн үлэлээбитим. Сайыным олус интэриэһинэйдик ааһан эрэр.
Кэпсэттэ Мария Аргунова