Улуустааҕы кииннэммит бибилэтиэкэ тиһигин иһинэн оҕо бибилэтиэкэтигэр тирэҕирэн тэриллибит «Умсулҕан» кэллиэксийэһиттэр түмсүүлэрэ тэриллибитэ 30 сылыгар аналлаах тэрээһин аһыллыыта култуура Дыбарыаһын сыанатыгар улуустартан кэлбит делегациялар уонна «Умсулҕан» түмсүү чилиэннэрэ барааттаан киириилэринэн, түмсүү салайааччытын солбуйааччы Анна Федорова түмсүү салайааччытыгар Станислав Луковцевка оҕо сааһы санатар пионерскай арааппар форматынан отчуотуттан саҕаланна.
Үөрүүлээх күнүнэн улуус баһылыгын солбуйааччы Анатолий Сторожев истиҥник эҕэрдэлээтэ. Мэҥэ-Хаҥалас Төҥүлүттэн Екатерина Михайлова эҕэрдэ суругу, ону тэҥэ нэһилиэк дьаһалтатын, «Абылаҥ» түмсүү ааттарыттан Алсиб салгын трассатын 80 сылынан оҥоһуллубут анал бэлиэни Бороҕонтон Петр Аммосовка, Анна Федороваҕа туттарда. Атын улуустартан кэлбит ыалдьыттарбыт истиҥ эҕэрдэлэрэ, Мэҥэ-Хаҥалас улууһун баһылыга Дмитрий Тихонов аатыттан эҕэрдэ суругу, кэрэ көстүүлээх вымпелы туттарыы саалаҕа өрө көтөҕүллүүнү үөскэттэ. Улуустааҕы култуура управлениетын кыл. специалиһа Анна Федорова култуура салаатын аатыттан эҕэрдэлээтэ. Түмсүү салайааччыта Станислав Луковцев түмсүү тэриллиитигэр, атаҕар туруутугар тус кылаатын, өйөбүлүн бэлиэтээн туран, Варвара Окоемоваҕа «Кэллиэксийэлээһин сайдыытыгар кылаатын иһин» бэлиэни туттарда.
Үөрүүлээх чааһы култуура Дыбарыаһын үлэһитэ Валентина Варламова хомоҕой тылынан салайан ыытыыта, Константин Иванов, Айаал Вырдылин, Елена Жиганюк сайаҕас ырыалара, Оксана Протопопова уонна Михаил Борисов вальсы чэпчэкитик көтөн-дайан толоруулара киэргэттэ. Култуура Дыбарыаһын үлэһиттэрэ, дириэктэр Алина Борисова салалтатынан, тэрээһин ыытыллыытыгар күүс-көмө буоллулар. Улууспутуттан Сыырдаахтан, Тиит Арыыттан, Майаҕастан, Чараҥтан, Тулунаттан, о.д. а. нэһилиэктэртэн кэлэн кыттыыны ыллылар. Кыттааччылар сертификаты кытта түмсүү 30 сылыгар ананан тахсыбыт хаһыат балаһатын туттулар. Үөрүүлээх чаас кэнниттэн быыстапкалары көрүүнү сэргэ араас сонун куонкурустар ыытылыннылар. Олохтоохтортон Татьяна Алексеева, Алексей Винокуров ыыппыт маастар-кылаастарыгар сылдьыбыттар астыннылар, сөхпүттэрин биллэрдилэр.
Ханнык баҕарар тэрээһин үгүс толкуйтан, үлэттэн тахсар. «Умсулҕан» түмсүү салайааччылара Станислав Луковцев, Анна Федорова, чилиэннэр Вера Портнягина, Мария Иванова, Мария Борисова, Марианна Борисова, Варвара Герасимова, о.д.а. бииргэ түмсэн көхтөөхтүк үлэлээн, 30 сылга аналлаах тэрээһин силигин толору ситэн ыытылынна.
Елена Сыроватская, уопсас.кэрэсп.