Ыччаты, дьиэ кэргэни өйүүр улуустааҕы социальнай-психологическай киин психолога Таисия Базарова бу күннэргэ Ростов-на-Дону куоракка госпитальга биир ыйга командировкаланан барар.
Кини онно анал байыаннай дьайыыга сылдьан бааһырбыт уолаттарга психологическай, волонтерскай көмөнү оҥоруоҕа.
Таисия барарын истэн улууспут дьахталларын түмсүүлэрэ бэйэлэрэ оҥорбут алгыс тыллаах сахалыы харысхалларын тиксэрдилэр. Ол курдук Мүрү нэһилиэгин «Күндүүнэ» түмсүү салайааччыта Анна Федорова психологическай кииҥҥэ кэлэн олорон оҥорбут «Биэс харах» харысхалларын, ону таһынан Майаҕас орто оскуолата (сал. Владимир Егоров, Сардаана Андросова) руна суруктаах араҥаччылыыр харысхалларын, Бороҕоннооҕу оҕо ускуустуба оскуолатын үөрэнээччилэрэ бэйэлэрин илиилэринэн тутан-хабан оҥорбут «Бөрө аһыыта» харысхалларын уонна Лөгөй нэһилиэгиттэн анал байыаннай дьайыыга сылдьар уоллаах ийэ Мария Софронова итиэннэ нэһилиэк депутата Дмитрий Шарков «Сэргэ», «Күөрэгэй» бэйэ оҥоһуу харысхалларын тиксэрдилэр. Бу илии сылааһынан оҥоһуллубут харысхаллар ымыы буолан, хорсун уолаттарбытын араҥаччылаан, этэҥҥэ эргиллэн кэлэллэригэр күүс-көмө буоллун.
Мария Аргунова