Сүөһү аһылыгын бэлэмнээһиҥҥэ биир саамай тутаах үлэ-хамнас – оттооһун – үмүрүйэн эрдэҕинэ бурдук хомуура саҕаланна. Ол курдук “Биэттэ-АГРО” хаһаайыстыба (сал. В.В.Сивцев) буолаҕа атырдьах ыйын 26 күнүттэн киирэн “көмүс туорааҕы” хомуйан эрэр. Кураан күннэр тураннар, хомуур күргүөмнээхтик, харгыһа суох баран эрэр.
Бүгүҥҥү туругунан, 287,73 гектар бааһына хомулунна. Онтон 335 т бурдугу хомуйбут. Ол иһиттэн 95 гектартан сэлиэһинэйи, 275 гектартан эбиэһи хомуйан бүтэрдэ. Быйыл 1 гектартан ортотунан 13 ц бурдугу хомуйан иһэллэр. Онон үүнүү урукку сыллардааҕар үчүгэй диэн этэллэр.
Биир улахан хаһаайыстыбалаах Дмитрий Илларионов билигин бурдук харайар ыскылаатын ситэрэ сылдьар буолан, хомуурун саҕалыы илик. Бу күннэргэ бааһынаҕа киирэргэ толору бэлэм олорор. Барыллааһын быһыытынан, бурдук үүнүүтэ үчүгэй.
Бу туһунан СӨ Сири кытта үлэҕэ сулууспатын сүрүннүүр исписэлииһэ Прокопий Белолюбскай иһитиннэрдэ.
Афанасий Сектяев