Талааннаах спортивнай тэрийээччи Николай Тарскай төрөөбүтэ 100 сылын туолар үбүлүөйдээх сылынан, күн сирин көрбүт күнүгэр, бүгүн – ыам ыйын 8 күнүгэр Мүрү 2№-дээх орто оскуолатыгар СӨ Бырабыыталыстыбатын бэрэссэдээтэлин солбуйааччы Сергей Местников, Ил Түмэн дьокутаата Геннадий Васильев, улуус баһылыгын солбуйааччы Анатолий Сторожев, улуус үөрэҕин управлениетын начальнига Степан Литвинцев кыттыылаах ВКС нөҥүө улуус оскуолаларын үөрэнээччилэрэ, учууталлара түмүстүлэр. Бу үөрүүлээх көрсүһүүгэ мустубут ыалдьыттар биир дойдулаахпыт, биллиилээх судаарыстыбаннай-уопсастыбаннай деятель, Саха сиригэр физическэй культура уонна спорт хамсааһынын төрүттээччи уонна салайааччы, САССР физкультура уонна спорт дьыалаларыгар кэмитиэтин бэрэссэдээтэлэ Николай Николаевич Тарскай олоҕун, кылгас кэмҥэ тэрийбит сүҥкэн үлэтин-хамнаһын туһунан билистилэр.
Мунньах сүрүн ыытааччылара – Баатаҕай орто оскуолатын үөрэнээччилэрэ, учууталлара холобур туттар биир дойдулаахтарын туһунан киэн тутта кэпсээтилэр. Биир дойдулаахтара Николай Тарскайы патриот киһи, Саха сирин спорт сайдыытыгар үгүс кылаатын киллэрбит талааннаах салайааччы быһыытынан сыаналаатылар, бэйэлэрин иһитиннэриилэригэр, ырыаларыгар-тойуктарыгар, спортивнай хамсаныыларыгар итэҕэтиилэхтик билиһиннэрэн көрдөрдүлэр. Баатаҕай орто оскуолатыгар 1991 сыллаахха Николай Тарскай үтүө аата иҥэриллибитэ. Кини аатынан спортивнай хайысхалаах музей 1996 сыллаахха тэриллэн күн бүгүнүгэр диэри ситимнээх үлэ ыытыллар.
Бу үөрүүлээх күн музейы төрүттээбит педагогическай үлэ ветерана Ксения Румянцева эҕэрдэ тылын тиэртэ. Николай Тарскай киһи быһыытынан үрдүк культуралааҕын, тус бэйэтинэн холобур буоларын бииргэ алтыспыттара кинини “дьикти, кэрэ киһи этэ” дииллэриттэн астына истэҕин. Оттон дьиэ кэргэнин туһунан иһитиннэриини “Н.Н. Тарскай дьиэ кэргэнэ, олоҕун салҕааччылар” диэн теманан 8 кылаас үөрэнээччитэ Айтал Аманатов оҥордо. “Уолан” диэн уолаттар ааҕыыларыгар “Үтүө аата умнуллубат”, “Саха тустуутун ырыата” диэн оскуола ансаамбылын ырыатынан эҕэрдэлээтилэр.
Түмүккэ спорт хайысхатыгар сүҥкэн көрүүлээх биир дойдулаахпыт Николай Тарскай сырдык аата үйэтитиллэригэр, олоҕо хаһан да умнуллубатыгар, үлэтэ-хамнаһа өрүү үрдүктүк сыаналанарыгар, кэнчээри ыччакка угуйар сулус буоларыгар эрэнэбит.
Светлана Сивцева