Улуус ветеринарнай үлэһиттэрин уопсай мунньаҕа буолан ааста. Онно ааспыт сыллааҕы үлэ түмүгүн улуустааҕы ветеринарнай управление начальнига Степан Жирков иһитиннэрдэ.
2023 сылга ыытыллыбыт үлэ үчүгэй түмүктээх буолбута бэлиэтэннэ, ол курдук Кэптэни бөһүөлэгэ сүөһү лейкоз ыарыытыттан босхоломмута, былааннаах профилактическай үлэ барыта толоруллубута ыйылынна.
Лейкоз курдук хроническай ыарыыттан босхолонуу олохтоох дьону кытта элбэх быһаарар кэпсэтииттэн, үгүс сөптөөх былааннаах үлэттэн тахсар.
Итини таһынан, ханнык да үлэҕэ буоларын курдук, кыра итэҕэстэр бааллара бэлиэтэннэ, онон олору туоратыыга киэҥ кэпсэтии таҕыста. Ол курдук быйыл туох үлэ оҥоһуллуохтааҕын туһунан тустаах управление специалистара, лаборатория быраастара чопчу ыйдылар, кэпсээтилэр.
Ветеринария салаатыгар сыл ахсын саҥа сокуоннар ылыллаллар, дьаһаллар тахсаллар, араас программалар үлэҕэ киирэллэр. Быйыл ынах сүөһү, сылгы барыта чопчу учуоттаныахтаах уонна Российскай регистрационнай «РегАрго» программаҕа киириэхтээх. Манна бэлэмнэнии үлэ ыытыллыбыта хас да сыл буолла, ынах сүөһү барыта учуоттанна.
Аны быйылгыттан сылгы барыта чиптэнэн учуокка ылыллара ирдэнэр буолла. Бу барыта РФ Правительствотын 550 №-дээх 2023 сыл муус устар 5 күнүнээҕи дьаһалыгар олоҕуран ыытыллар. Онон хас биирдии сылгылаах киһи «Меркурий» программаҕа регистрацияланыахтаах оччоҕо эрэ кини сылгылара «РегАрго» программаҕа киирэллэр.
Онуоха регистрацияланар сайабылыанньа бланкалара олохтоох ветеринарнай пууннарга, лечебницаларга бааллар, онон олохтоох ветеринардары кытта билсэн толорорго тиэтэйиҥ. Тоҕо диэтэргит, бастатан туран, ыанар ынахха, төрүүр биэҕэ көрүллэр субсидиялар инникитин бу программаҕа олоҕуран бэриллэр буолаллара былааннанар.
Саргылаана Бурнашева, Бээрийэ нэһилиэгин ветбырааһа