Мүрү 1 нүөмэрдээх орто оскуолатын 7-с кылааһын ситиһиилээхтик бүтэрбит Диана Егорова сүүрүүгэ маҥнайгы интэриэһэ 1-кы кылааска үөрэнэ сырыттаҕына физкультура учуутала Иван Винокуров ОФП күрэхтэһиитигэр кытыннарыытыттан саҕаламмыта.
Талааннаах кыыс Бороҕоннооҕу музыкальнай оскуола бальнай үҥкүүгэ уһуйааччытыгар Марианна Ермолаеваҕа дьарыктаммыта. Үҥкүү алыбын баһылаабыт кэрэчээн намчы кыыс 2019 сыллаахха Бороҕоннооҕу оҕо спортивнай оскуолатыгар Мария Слепцоваҕа дьарыгын саҕалаабыта. Ити иһигэр 1,5 сыл устата тренер Иван Ивановка наартанан дьарыкка эмиэ сылдьан, спорт араас көрүҥүн баһылаабыта.
Ол кэнниттэн спорт королеватынан аан дойдуга ааттаммыт сүүрүү көрүҥүн сөбүлээн, билигин бэһис сылын сүүрүү тренердэригэр Иннокентий Колодезниковка уонна Мария Слепцоваҕа утумнаахтык дьарыктанан «Азия оҕолоро» оонньууларга кыттар чиэскэ тиксэн, уһун тыыннаахтар киирсэр дистанцияларыгар кытынна. 1500, 3000 дистанцияҕа сүүрүү киһиттэн үгүс күүһү, сэниэни, дьулууру эрэйэр. Биһиги нарын-намчы кыыспыт Диана Егорова маннык хаачыстыбалары баһылаан Саха Республикатын сүүмэрдэммит хамаандатыгар киирбитэ туһугар улахан ситиһии, кыайыы. Биир дойдулаахтара Диана Саха сирин оҕолоругар холобур буолбутунан киэн туттабыт.
Диана республика күүстээх сүүрүүгэ буоларын үгүс күрэхтэһиигэ бастыҥ буолбут ситиһиилэрэ көрдөрөллөр. Ол курдук 2021 с. «Түргэн наарта» диэн республика турнирыгар 1-кы миэстэ, «Тугутчаан-2021» республика түргэн наарта турнирыгар 3-с м., 2022 с. 12 саастарыттан үөһээлэргэ Саха сирин бастакы марафонугар 400 м 1-кы миэстэ, 2023 с. республика чэпчэки атлетикаҕа күрэхтэһиитигэр 1500 м дистанцияҕа 2-с м., 3000 м дистанцияҕа 2-с м., Саха Республикатын оҕолорун «Спортивные якутяне» спартакиадатыгар 3000 м дистанцияҕа 3-с м., 2024 с. «Азия оҕолоро» оонньууларга сүүмэрдиир республика күрэхтэһиитигэр 1500 м уһуҥҥа 1-кы м., 3000 м – 3-с м., о.д.а. ситиһиитэ үгүс.
Светлана Сивцева