Улуус баһылыга Василий Аммосов уонна дьаһалта тустаах управлениеларын, тэрилтэлэр салайааччылара бэҕэһээ, тохсунньу 23 күнүгэр, Өлтөх, Бэрт Ууһун нэһилиэктэригэр ааспыт сыл түмүктэрин отчуоттаатыылар.
Бэйдиҥэҕэ ФАП тутуллуоҕа, оскуола өрөмүөннэниэҕэ
Баһылык отчуота Бэйдиҥэ бөһүлэгэр быйылгы былааҥҥа саҥа ФАП тутуута уонна 2025 сылга оскуола капитальнай өрөмүөнэ былааҥҥа киирбитин Василий Аммосов үөрүүлээх иһитиннэриитинэн саҕаланна.
Олохтоохтор үөрэллэр. Ол гынан баран оскуола дириэктэрэ Елена Дансанурова оскуола өрөмүөнүн үбэ-харчыта ис өттүгэр эрэ көрүллэринэн, оскуола тас бүрүөһүнүгэр, септигэр, турбатыгар, теплотрассатыгар, былаһааккатыгар, тимир олбуорун ситэриллиитигэр үлэни быйыл ыытар былааннахтарын этэн туран, көмө көрдөстө.
Онуоха Василий Иванович олохтоох нэһилиэнньэ көҕүлээһинин өйүүр федеральнай бырагырааммаҕа (ППМИ) кииристэххэ кыаллыан сөбүн ыйда. Бырайыак, смета оҥорон, улуус дьаһалтатын кытта үлэлэһэн бу бырагыраамаҕа киирсэллэригэр сүбэлээтэ.
Итиэннэ олохтоохтор кылабыыһа турар сирэ эмтэрийэн Эбэҕэ түһэр кутталламмытын туоратар үлэни суһаллык ыытарга күүс-көмө көрдөстүлэр.
Отчуоттуур мунньахха үгүс санаатын эппит Николай Сивцев Мүрү нэһилиэгин олохтооҕо Иван Васильев пилораматын үлэтин туһунан улуус хаһыатыгар ааҕан биһирээбитин эттэ, маннык өҥөнү оҥорооччулар элбииллэригэр баҕарда уонна улуус өттүттэн урбаанньыттары өйүүр үлэ салгыы хайдах барыаҕын туоһуласта.
Василий Иванович инникитин чахчы көдьүүстээх үлэлээх баар урбаанньыттары уонна чахчы туһалаах дьыаланы тэринэргэ санаммыт саҥа саҕалааччылары өйүөҕүн туһунан эттэ. Оттон улууска тутуу матырыйаалын оҥорон таһаарыыны сайыннарыы былаанын тобула сылдьалларын бэлиэтээтэ.
Салгыы Николай Николаевич тыа хаһаайыстыбатыгар нэһилиэктэргэ үүтү тутууну сөптөөхтүк тэрийдэххэ эрэ сүөһүнү иитээччи элбиэҕин туһунан санаатын эттэ, итиэннэ Василий Иванович нэһилиэк сайдыытын ураты болҕомтолоохтук көрөрүн бэлиэтээн, улуус дьаһалтатын үлэтин сөптөөҕүнэн сыаналыырга этии килэрбитин олохтоохтор биир киһи курдук өйөөтүлэр.
Арыылаахха саҥа хочуолунай уонна оскуола тутуллуоҕа
Василий Аммосов Арыылаахха хочуолунай тутуллуутун былаана быйылгы сылга киирбитин, эһиилги сылга Орто Эбэ коррекционнай оскуолатыгар 50 миэстэлээх саҥа дьиэни тутуу былааҥҥа киирбитин туһунан этиитин олохтоохтор ытыс тыаһынан биһирээтилэр.
Уулусса остуолбаларын саҥардыы, эргэрбит трансформаторы уларытыы боппуруостара күүскэ турдулар. Оҕо саадыгар толору хааччыллыыны киллэриини, оскуолаҕа саҥа массыынаны туруорустулар. Ону таһынан бөһүөлэккэ олорон эрэ үлэлиир биэлсэр наадатын эттилэр. Онуоха быйыл медколледжы бүтэрэр выпускник үлэлии тахсарын туһунан улуустааҕы киин балыыһа кылаабынай бырааһын солбуйааччы Алина Абрамова иһитиннэрбитин олохтоохтор үөрэ ылыннылар. Тыа хаһаайыстыбатын өттүгэр үүт тутар собуот үлэлиэҕин туруорсан көрдүлэр да, ороскуота бэрт, ол кэриэтэ үүт таһар массыына сырыыта кыаллыан сөбүн бэлиэтээтилэр. Отчуоттуур мунньах түмүгүнэн улуус дьаһалтатын үлэтин сөптөөҕүнэн сыаналаатылар.
Сыырдаахтарга ититии – тыын боппуруос
Сыырдаах орто оскуолатын дириэктэрэ Иван Портнягин: «Былырыын интэринээт сабыллан, алта киһи үлэтэ суох хаалбыта нэһилиэнньэҕэ охсуулаах буолла диэн эттэ, онон интэринээти төттөрү сөргүтэргэ санаатын эттэ. Итиэннэ, улуус үрдүнэн Сыырдаах уонна Танда эрэ оскуолатыгар тыраахтар ыытарга үөрэтэр, права биэрэр лицензиялаахтарын санатан туран, ону туһаммакка олороллорунан штат көрдөстө.
Олохтоохтор өссө саҥа детсад дьиэтин, Кыыс Хаҥа үрэҕин туоруур иккис сылын алдьанан турар муостаны, ыччаты кытта үлэлиир исписэлииһи туруорсаллар. Итиэннэ түөр кыбартыыралаах саҥа дьиэ алдьаммытын өрөмүөннүүргэ дьиэ олохтооҕо көрдөстө. Саамай тыын боппуруостарын ититии боппуруоһун туруордулар, саҥа тутуллар хочуолунай дэриэбинэ аҥаарын кыайбатын мунаахсыйалларын биллэрдилэр.
Мария Аргунова