«Оҕону патриот тыыныгар иитиигэ дьиэ кэргэн, аҕа сүрүн оруолу ылыахтаахтар, оҕону айылҕаҕа чугаһатыыга, үлэҕэ уһуйууга, эт-хаан өттүнэн эрчийиигэ болҕомто күүһүрүөхтээх», – диэн учуутал, элбэх оҕолоох аҕа Иван Иванов бигэ санаалаах.
Дьиэ кэргэн, Оҕо саас, Аҕа сылларынан Мүрү 1-гы нүөмэрдээх орто оскуолатыгар үлэлиир физкультура учууталларыттан биирдэстэрин биэс оҕолоох аҕаны Иван Иванову көрсөн кэпсэттим.
Иван Иванов алта оҕолоох Евдокия Иннокентьевна, Иван Иванович Ивановтар иккис оҕолоро. Кини төрөппүттэрин улуус нэһилиэнньэтэ, успуорт бэтэрээннэрэ үчүгэйдик билэллэр. Иккиэн сүүрүүнэн дьарыктаммыт, улуус чиэһин өрөспүүбүлүкэҕэ элбэхтик чиэстээхтик көмүскээбит дьон, Иван Иванович үгүс оҕону успуорка уһуйбут тренер этэ, Евдокия Иннокентьевна уран тарбахтаах иистэнньэҥ, норуот маастара. Ивановтар алта оҕолоро бары үлэһит, дьиэ кэргэннээх дьон. Улахан кыыс Туяра Бүлүүгэ чэпчэки атлетикаҕа старшай тренер, оттон ыал төрдүс оҕото Илья Покровскай колледжыгар физкультура учуутала.
Иван икки үрдүк үөрэхтээх. 2003 с. ДьГТХА технолог идэлээх, 2015 с. ХИФУ физкультура, успуорт институтун бүтэрбитэ. Иван биэс оҕотуттан улахана Ангелина Хамаҕатта орто оскуолатын тохсус кылааһыгар үөрэнэ сылдьан национальнай ыстаныыга успуорт маастара буолбута. Билигин Намнааҕы педколледжка үөрэнэр. Ваня Суоттуга профтехникумҥа механик идэтигэр үөрэнэр. Сахайаана оскуола 4-с кылааһын үчүгэй үөрэнээччитэ, Айтал 1 кылааска үөрэнэр, Эрхаан «Кэскил» уһуйаан иитиллээччитэ. Кэргэнэ Алена Иннокентьевна полицияҕа үлэлиир.
Ивановтар Мындаабаҕа аныгылыы тупсаҕай быһыылаах икки этээстээх дьиэни туттан быр-бааччы олороллор. Ыал аҕата оҕолор эт-хаан өттүнэн сайдалларыгар болҕомтотун уурар. Сахайаана өссө бастакы кылааска үөрэнэ сылдьан наартаны ойууга өрөспүүбүлүкэҕэ призердаабыта.
Иван Иванович оскуола оҕолорун хотугу многоборье көрүҥнэригэр дьарыктыыр. Уһуйар үөрэнээччилэриттэн Сивцева Ира, Егорова Диана «түргэн наарталар» көрүҥҥэ өрөспүүбүлүкэҕэ чемпионнаабыттара, Васильева Надя, бырааттыы Данил, Кирилл Жирковтар, Николаева Алеся призердаабыттара. «Олоҥхо оонньууларыгар» Овчинников Богдал II миэстэни ылбыта. Учуутал хотугу многоборьеҕа өрөспүүбүлүкэ таһымнаах күрэхтэһиини оскуолаҕа ыыппыта. Аҕатын Иван Иванович Иванов аатынан чэпчэки атлетикаҕа күрэхтэһиини икки сылга биирдэ ыытар. 2021 с. Суоттуга, 2023 с. Бүлүүгэ тэрийсэн ыыппыта.
Учуутал, аҕа 2024 сыл дьиэ кэргэҥҥэ, оҕоҕо, аҕаҕа туһуламмытын биһириир. Аҕа оруола үрдүүрүгэр аҕа оҕотунаан араас форманан тэрээһиннэри ыытары сөптөөҕүнэн ааҕар. Оҕо «мин аҕам» диэн тылы элбэхтик этэрин туһугар ийэ киһи аҕаҕа, оҕоҕо күүс- көмө буолуохтаах. Бастыҥ аҕалары сырдатыы, бэлиэтээһин күүһүрүөхтээх диэн санаатын үллэһиннэ.
Елена Сыроватская, суруналыыс