Г.В. Егоров аатынан Мүрү 1 нүөмэрдээх орто оскуолатыгар педагог уонна уһуйааччы сылын түмүктүүр нэдиэлэ оскуола физикаҕа үрдүк категориялаах учуутала, РФ үөрэхтээһиҥҥэ уонна иитиигэ бочуоттаах үлэһитэ, СӨ үөрэҕириитин туйгуна Николай Аммосов хаартысканан айар үлэтин быыстапкатын аһыллыытынан саҕаланна.
Николай Васильевич 42 сыл устата оҕону үөрэтиигэ, иитиигэ үлэлиир, биир уопуттаах учуутал буолар. Кэккэ сылларга электротехника, электросварка диэн биридимиэттэри үөрэтэ сылдьыбыта, дьиэҕэ-уокка, олоххо туһалаах үөрүйэхтэри үгүс оҕоҕо иҥэрбитэ. Сүүстэн тахса уол «Тыа хаһаайыстыбатын производствотын электромонтера» диэн идэлээх оскуоланы бүтэрбиттэрэ. Физика, астрономия учууталынан, робототехника куруһуогун салайааччытынан сыратын ууран үлэлиир. Үөрэтэр оҕолоро өрөспүүбүлүкэҕэ 15 төгүл чөмпүйүөннээбиттэрэ, норуоттар икки ардыларынааҕы күрэхтэһиигэ 2-с миэстэни ыла сылдьыбыттара. Учуутал эдэр сааһыттан фотоаппарааты кытта доҕордоһон хаартыскаҕа түһэриинэн үлүһүйэр, үгүс бириэмэтин сөбүлүүр дьарыгар аныыр.
Быыстапка аһыллыытыгар тоҕуоруһа мустубут дьону саха сиэринэн үрүҥ ас маанытынан, саһарчы буспут алаадьынан күндүлээтилэр. Николай Васильевич уһун сылларга оскуола тэрээһиннэрин хаартыскаҕа түһэрэн үйэтитиигэ үлэтин сүрүн өттүн арыйан билиһиннэрдэ уонна туохтан да чаҕыйбакка бу үлэнэн умсугуйан дьарыктанарын эттэ. Учууталы Арассыыйа образцовай үтүөлээх «Кэнчээри» ансаамбыла (сал. Василий Парников) «Учууталга» ырыаны киһини долгутар гына толордо. Оскуола дириэктэрэ Игорь Сивцев бэйэтин этиитигэр Николай Аммосов оскуола үлэтин кэпсиир сыаналаах хаартысканан архыыбы мунньубутун уонна бу үлэлэриттэн оскуолаҕа бэлэх ууммутун махтанан туран бэлиэтээтэ. Салгыы оскуола профкомун бэрэссэдээтэлэ Люция Бурцева, «Спектр» миэтэдхолбоһук салайааччыта Виктория Афанасьева эҕэрдэ тылы эттилэр.
Быыстапканы арыйыы лиэнтэтин оскуола дириэктэрэ Игорь Сивцев, профком бэрэссэдээтэлэ Люция Бурцева уонна айар үлэтин бар дьон көрүүтүгэр таһаарбыт Николай Аммосов быстылар. Тэрээһиҥҥэ кэлбит дьон өрө көтөҕүллүүгэ куустаран үөрэ-көтө хаартыскаҕа түстүлэр, быыстапкаҕа турбут хас биирдии үлэни сыныйан көрдүлэр, ааспыт кэми иһирэхтик ахтан-санаан ыллылар.
Елена Сыроватская, уопсас. кэрэсп.