Сэбиэскэй кэм саҕана, дойду барыта ньиргиччи үлэлээн-хамсаан олорор кэмигэр, Дьоруой Дьөгүөрэп сопхуос Түүлээх отделениетыгар Баллыкы кырдалыгар саҥа механизированнай хотон үлэҕэ киирбитэ.
Үлэһиттэргэ үлэлииллэригэр усулуобуйа лаппа чэпчээбитэ. Ол курдук сүөһүнү уулатар, дуойка, сааҕы таһаарар, сүөһү аһын сыаҕа толору үлэлээн барбыта. Манна 240-ча ынах ыанара. Тохсунньу 1 күнүнээҕи инвентарь түмүгүнэн 900-тэн тахса ынах сүөһүлээх, 240-ча сылгылаах буоларбыт. Эбии аһылык бэлэмэ кыһыннары 40-50 кыраадыс тымныыга субуотунньугунан талах быһыыта, дулҕа хомуйуута, от кырбатыыта күүскэ ыытыллара.
Түүлээх нэһилиэгэр ол кэмнэргэ олус күүскэ социальнай хаһаайыстыба тутуулара ыытыллыбыттара. Ити кэмнэргэ туох баар тутуу барыта бу сопхуос үбүлээһининэн, күүһүнэн тутуллара. Ол курдук 4 квартиралаах уопсай дьиэ, толору механизациялаах икки хотон, кормоцех. Үрдүк күүрүүлээх уот ситимэ, өрүстэн тахсар 8 км усталаах гравий суол, республикаҕа суох 96 миэтэрэ усталаах күөлү туоруур муоста, 25 миэстэлээх оҕо саада, балыыһа, дьаһалта хонтуората, АТС дьиэтэ, онтон да атын эбийиэктэр тутуллан үлэҕэ киирбиттэрэ, билигин да үлэлии тураллар.
Билигин санаатахха, инникини өтө көрөн, олус да туһалаах баараҕай тутуулары 120 үлэһиттээх отделение кыайа-хото туппут эбит. Кэлин Түүлээх отделениета ыһыллыбакка ТХПК, КП диэн ааттарынан уларыйан 2014 сылга диэри үлэлээбитэ.
Билигин ити 96 миэтэрэлээх оччолорго социальнай хайысхалаах муостабыт алдьанан эрэрэ киһини хомотор.
Туйаара Ушницкая, уопсас. кэрэсп.