Оҕону патриотическай тыыҥҥа иитэр дьоһун суолталаах “Улууспут киэн туттуута – Дьоруойдарбыт!” тэрээһин түөрт Дьоруойдаах Байаҕантай нэһилиэгэр ыытылынна.
Үөрэхтээһин эйгэтигэр оҕону патриотическай тыыҥҥа иитии ыйын чэрчитинэн ыытыллыбыт тэрээһиҥҥэ биир дойдулаахпыт Россия Дьоруойа Алексей Неустроев кыттыбыта өссө үрдүк суолталанна. Кини дьоруойдуу быһыытыгар-майгытыгар сүгүрүйэн оскуолаҕа Дьоруой паартатын туруорар үөрүүлээх түгэн буолла. Итиэннэ атах тэпсэн олорон, «Дьоһуннааҕы кэпсэтии» диэн аһаҕас уруокка кытынна. Манна кини араас ыйытыыларга хоруйдаата, баҕа санаатын үллэһиннэ, түгэнинэн туһанан үөрэммит оскуолатын учууталларыгар барҕа махтал тылларын эттэ.
Тэрээһин үөрүүлээх чааһыгар оскуола дириэктэрэ Константин Готовцев Дьоруой Алексей Неустроев бастакы учууталыгар Розалия Громоваҕа, салгыы оскуоланы бүтэриэр диэри кылааһын салайааччытынан үлэлээбит Марфа Ноговицынаҕа, оччолорго үлэлээбит дириэктэргэ Надежда Егороваҕа, Алексей Неустроевка махтал суруктарын туттарда.
Улуус баһылыгын солбуйааччы Анатолий Сторожев Россия Дьоруойдара төрөөбүт-үөскээбит дойдуларыгар суол-иис, социальнай эбийиэктэр тутуллалларыгар кыахтар баалларын өссө төгүл этэн туран махталын тиэртэ. Бүгүҥҥү тэрээһиҥҥэ Россия Дьоруойун кытта атах тэпсэн олорон үгүһү билиҥ, туһалаах кэпсэтиини таһаарыҥ диэн баҕа санаатын эттэ.
Улуус үөрэҕин управлениетын начальнига Степан Литвинцев оҕолорго туһаайан патриотизм дьиэ кэргэнтэн саҕаланарын, төрүччүнү билииттэн саҕылларын туһунан кэпсээтэ. Итиэннэ эр дьон, уол оҕо оруолун, дойдуга бэриниилээх, тапталлаах буолууга туһуламмыт ыйга биирдэ ыытыллар тэрээһиннэр саҕаланыахтара диэн иһитиннэрдэ. Туһалаах кэпсэтиини баҕарда.
Бу курдук оҕолор аһаҕас, музейнай уруоктарга, литературнай салоҥҥа, квест-оонньууга, төгүрүк остуолга о.д.а. интэриэһинэй кэпсэтиилэргэ кыттан, санаалара бөҕөргөөн, көрүүлэрэ уларыйан, айарга-тутарга күүс-уох ылан тарҕаспыттарыттан саарбахтаабаппыт.
Дойду үрдүнэн үөрэхтээһин эйгэтигэр биир суолталаах сорук – оҕону патриотическай тыыҥҥа иитии – улууспут үөрэҕин тэрилтэлэригэр эмиэ биир бастакынан турар. Онуоха бүгүҥҥү тэрээһиҥҥэ улуус үөрэҕин салалтатын, бүтүн Россиятааҕы “Бастыҥнар хамсааһыннара” улуустааҕы оҕо хамсааһынын, Танда орто оскуолатын коллективын түмсүүлээх үлэтэ кэнчээри ыччаппыт сайдыытыгар сүҥкэн кылааты оҥордо.
Ольга Шепелева