Бороҕон нэһилиэгэр тохсунньу 27 күнүгэр «Түмсүү» сынньалаҥ киинигэр нэһилиэк олохтоохторо, ыалдьыттара, ветеран учууталлар, оскуола учууталлара, араас сыллар выпускниктара Тумул орто оскуолатын бэйэни салайыныыга үлэтин уопутун сырдатар «Оҕоҕо итэҕэл – кинини арыйар күлүүс» ахтыы кинигэ презентациятын үөрүүлээх тэрээһинигэр муһуннулар.
Ол курдук Тумул орто оскуолатыгар 1974-1989 сс. французскай тыл учууталынан, иитэр үлэҕэ директоры солбуйааччынан үлэлээн, бэйэни салайыныыга киэҥ хабааннаах үлэни сүрүннээбит педагогическай үлэ ветерана, РСФСР үөрэҕириитин туйгуна, СР ыччат политикатыгар туйгуна, “Уус Алдан улууһун социальнай-экономическай сайдыытыгар кылаатын иһин”, “Уус Алдан улууһун үөрэҕириитин сайдыытыгар кылаатын иһин” бэлиэлэр кавалердара, Бороҕон нэһилиэгин бочуоттаах олохтооҕо Елена Аммосова сыралаах үлэтин сыаналаан, таһаарыылаах үлэтин сырдатан махталлаах үөрэнээччилэрэ, убаастыыр учууталбыт үюүлүөйдээх сааһынан уонна Учуутал уонна настаабынньык сылынан Новосибирскай куоракка 200 экземплярынан бэчээттэтэн таһаартарбыт кинигэлэрин сүрэхтээтилэр. Кинигэ тахсыытыгар араас сыллар выпускниктара күүс-көмө буоллулар, сүрүн спонсор – үөрэнээччитэ Петр Алексеев.
Бу тэрээһиҥҥэ Тумул орто оскуолатын ветеран учууталлара, педколлектива, араас сылларга бүтэрбит выпускниктар кыттыыны ыллылар. Үөрүүлээх чааска Бороҕон нэһилиэгин дьаһалтатын баһылыга Василий Алексеев эҕэрдэтин тиэрдэн туран, Елена Петровнаҕа «СӨ үөрэҕириитин ситимин бочуоттаах үлэһитэ» анал бэлиэни туттарда.
Ахтыы кинигэни сырдатыы медиаслайданан көрдөрүллэн учууталлар, үөрэнээччилэр оччотооҕу сыллары ахтан-санаан аастылар, үгүс эҕэрдэ этилиннэ. В.М. Прокопьев аатынан Тумул орто оскуолатын үөрэнээччилэрин толорууларыгар «Эҕэрдэ үҥкүүтэ», «Школьный вальс» үҥкүүлэрин биһирээтибит, эбии үөрэхтээһин педагога Елена Иванова, убаастабыллаах учууталыгар Елена Петровнаҕа үөрэппит үөрэнээччитэ СӨ үөрэҕириитин туйгуна, учууталлар Учууталлара Варвара Черемкина анабыл хоһоонноро ааҕылыннылар, ырыанан эҕэрдэлэрин Марсен Протопопов, Андрей Макаров, Василий Алексеев тиэртилэр.
Итини таһынан Елена Петровна үөрэппит оҕолоро оччотооҕу кэми санаан араас соһуччу бэлэхтэри оҥорон соһуттулар. Олортон биирдэстэрэ – «Романтика» агитбиригээдэ эҕэрдэ туруоруута буолла, ону Альберт Васильев музыканан киэргэттэ. Оскуола библиотекара Сардана Стрекаловская, нэһилиэк библиотекара Светлана Прудецкая быыстапка туруоран, нэһилиэк музейын фондатыттан материаллары билиһиннэрдилэр.
Сценарийы, презентацияны библиотекарь Светлана Прудецкая, учуутал Варвара Черемкина суруйдулар, таҥнылар. Презентацияны үөрэнээччилэрэ Алёна Яковлева, Светлана Прудецкая салайан ыыттылар, хаартыскаҕа Виктория Петрова түһэрдэ.
Түмүккэ учууталбыт Елена Петровна Аммосова 70-80 сылларга үлэлэппит хаартыска куруһуогун хаартыскаларын мунньан альбом оҥорбутун А.Р. Халдеева аатынан модельнай библиотекаҕа бэлэхтээтэ. Бу тэрээһиҥҥэ Елена Петровна үөрэппит оҕолоро бука бары күүс-көмө буоллулар. Учууталга саамай үрдүк наҕараада – үөрэппит оҕолорун истиҥ махталлара, үрдүк ситиһиилэрэ. Бу – учуутал үрдүк үөрүүтэ, дьоло.
Светлана Прудецкая, библиотекарь, уопсас. кэрэсп.