Бэҕэһээ Тумулга аҕам саастаахтарга Саҥа дьыл тэрээһинэ үрдүк таһымҥа ааста. Нэһилиэкпитигэр кырдьаҕастар сэбиэттэрин бэрэсэдээтэлинэн Петр Егорович Черкашин ананан үлэтин олус бэрткэ саҕалаата, үгүс үлэ ыытыллыбытын сырдатта.
Нэһилиэкпит баһылыга Василий Алексеев аҕам саастаахтарга барыларыгар үүммүт 2024 сылынан эҕэрдэ суруктары, Зоя Протопоповаҕа, Раиса Барашковаҕа, Мария Габышеваҕа өйдөбүнньүк бэлиэлэри, нэһилиэк депутатыгар Татьяна Новоприезжаяҕа быыбарга күүскэ үлэлээбитин иһин республикабыт Ил Дархана Айсен Николаевтан махтал суругу уонна быыбар хамыыһыйатын бочуоттаах грамотатын туттарда. Биһиги нэһилиэкпититтэн өрөспүүбүлүкэтээҕи «Читающая семья – читающая Якутия» фестивальга ситиһиилээхтик кыттыбыт үс көлүөнэ Черкашиннар дьиэ кэргэннэригэр СӨ Национальнай библиотекатын «Читающая семья-2023» диплома тутарылынна, Россияҕа Учуутал уонна настаабынньык сылынан үгүс быыстапкаҕа уус-уран оҥоһугунан, коллекциятынан кыттыбыт педагогическай үлэ ветерана Татьяна Габышеваҕа махтал сурук олохтоох библиотека аатыттан тутарылынна.
Бу киэһэҕэ элбэх эҕэрдэ этилиннэ, оонньуу оонньонно, ырыа ылланна. Оттон библиотека ыыппыт биктэриинэтин кыайыылааҕынан Ирина Черкашина буолла, педагогическай үлэ ветерана Зоя Протопопова оонньоппут оонньууларыгар сөптөөх хоруйдары биэрэн Татьяна Габышева элбэх бирииһи тутта. Анна Алексеева көрдөөх оонньуутун кыайыылааҕынан Галина Алексеева таҕыста, Ион Соловьев оонньоппут оонньуутун кыайыылааҕынан Анастасия Габышева буолла, сүүйүүлээх лотереяҕа Матрена Алексеева супер бириискэ бижутерия наборун тутан үөрүүтэ үрдээтэ. Үлэ ветерана Розалия Васильева бэйэтэ олохтообут бирииһин Акулина Сокольниковаҕа махтанан туран туттарда. Маскарад көстүүмнэрин көрүүгэ Екатерина Сухонина, Мария Габышева, Ирина Черкашина кыайыылаахтарынан ааттаннылар.
Тэрээһини култуура үлэһитэ Ион Соловьев иилээн-саҕалаан ыытта, музыкальнай эҕэрдэлэри нэһилиэк баһылыга Василий Алексеев, баһылыгы солбуйааччы Марсен Протопопов, култуура үлэһиттэрэ Андрей Макаров, Альберт Васильев, Ион Соловьев тиэртилэр, Тымныы оҕонньор, Хаарчаана кыыс истиҥ эҕэрдэлэрин эттилэр. Тэрээһиҥҥэ социальнай үлэһиттэр, «Түмсүү» сынньалаҥ киинин үлэһиттэрэ күүс-көмө буоллулар. Тэрээһинтэн аҕам саастаахтар бириис тутан үөрэн-көтөн, дуоһуйа сынньанан тарҕастылар.
Светлана Прудецкая, библиотекарь, уопсас. кэрэсп.