Улуустааҕы үөрэх управлениетын, «Өркөн” оҕону эбии үөрэхтээһин киинин тэрийиилэринэн “ТУК-ТУК, профессия!” (Тал Уонна Кыай — Творение, Умение, Креативность) чемпионат быйыл төрдүс төгүлүн кулун тутарга ыытыллара былааннанар. Бу чемпионат уһуйаан иитиллээччилэриттэн саҕалаан, орто сүһүөх кылаас оҕолорун хабан идэҕэ туһаайар сыаллаах.
Бу проект автордарынан, эбии үөрэхтээһин киинин педагогтара Евгения Местникова, Матрена Леонтьева буолаллар. Евгения Климентьевна “Өркөн” оҕону эбии үөрэхтээһин киинигэр үлэлээбитэ 10 тахса сыл буолла. Ол курдук кини “Magic kraft” диэн куруһуогар оҕолор айар дьоҕурдарын сайыннарыыга, креативнай өйдөөх-санаалаах дьону иитэн таһаарарга болҕомтотун ууран үлэлиир. Иитиллээччилэрэ сылын аайы “Профессионалы” куонкуруска “Косметология” диэн компетенцияҕа кыттан, Россияҕа тиийэ үгүс ситиһиилэрдээхтэр. Бу куруһуокка сылдьар оҕолор иистэнэргэ, уруһуйдуурга, араас матырыйааллартан оҥоһуктары оҥорорго үөрэнэллэр.
Матрена Лазаревна оҕо толкуйдуур дьоҕурун сайыннарар сыаллаах “Ментальная арифметика” куруһуогу ситиһиилээхтик үлэлэтэр. Бу куруһуокка сылдьар оҕолор головоломкалары, араас дойдулар оонньууларын билэллэр, психология кистэлэҥнэринэн, араас эрчиллиилэринэн сайдаллар. Хас биирдии оонньуу мындырдык толкуйданан, дьарыктаныыларга оҕолор болҕомтолорун тардан, олимпиадаларга кыттыыларыгар, үөрэхтэригэр туһалыыр. Маннык талааннаах педагогтар биир өйгө санааҕа киирэннэр, тэрийэр дьоҕурдарынан үгүс оскуолалары, оҕо тэрилтэлэрин түмтүлэр.
Ол курдук, быйыл аныгы үйэ кэскиллээх идэлэрэ эбиллэн биэрэннэр 25 хайысханан 10 площадканан: Уус Алданнааҕы техникум, Суотту агрооскуолатын, Лөгөй лицей-интернатын, Мындааба, Мүрү 1, 2 №-дээх, Дүпсүн орто оскуолаларын, Сэһэн Ардьакыап аатынан кыраайы үөрэтэр түмэл, “Кэскил” оҕо уһуйаанын, “Өркөн” эбии үөрэхтээһин киинин баазаларыгар ыытыллар. “Тук-тук, профессия» чемпионат сылын аайы хайысхалара кэҥээн, кыттааччытын ахсаана элбээн иһэр.
Бастакы чемпионатка 2022 сыллаахха 125 оҕо кыттыбыт эбит буоллаҕына, былырыын 444 оҕо кыттан, тэрийээччилэр туруоруммут сыалбытын ситиспиппит. Кырачааннар пластилинтан, оҥоһуктан саҕалаан, мобильнай робототехникаҕа, графическай дизайнер, цифровой худуоһунньук, бортпроводник курдук кэлэр кэм идэлэригэр бэйэлэрин холонон көрүөхтэрэ. Былырыыҥҥы чемпионат үөрүүлээх сабыллыыта В.В. Никифоров –Күлүмнүүр аатынан дыбарыаска ыытыллан, кыайбыт хамаанда кубогынан, кыайыылаахтар мэтээл, грамота ыланнар үөрүүлэрэ үгүс этэ.
Оҕолор бу күрэххэ бэлэмнэммит сыралара халтай хаалбакка, инники олохторугар идэлэрин таларга төһүү буолуо диэн эрэнэбит. “Тук-тук, профессия!” чемпионат сайдар кэскиллээх. Быйылгы кыайыылаахтар Илин эҥээр чемпионатыгар кыттар чиэскэ тиксиэхтэрэ, улууспут аатын ааттатыахтара.
Галина Матвеева, методист, улуустааҕы тирэх киин салайааччыта