Суоттутааҕы “Туйма” ТХПК бэрэссэдээтэлэ Владислав Мухин иһитиннэрбитинэн, улуус дьаһалтатын өйөбүлүнэн тыа хаһаайыстыбатын министиэристибэтин 8 мөлүйүөн суумалаах граны ылан эт сыаҕын тутан, атырдьах ыйын 30 күнүгэр үлэҕэ киирдэ. Саҥа сыахха улахан кыамталаах элбэх оборудование турда.
Онон кэпэрэтиип саҥалыы тыынынан полуфабрикат астары: тефтель, котлет, фрикадельки, фарш, пельмень оҥорон таһаарыыта күүһүрэн, атыыга таһааралларын таһынан улуус оскуолаларын хааччыйыахтара. Инникитин ыыһаммыт эти, халбаһыылары оҥорор былааннаахтар.
Быйыл күһүн сэттэ туонна эти тутар былааннаахтар. Барыта 11 хаһаайыстыбаттан үүтү тутан былааннарын 70% бырыһыан толорбуттар. Үүт ас эгэлгэтин: суорат, йогурт, творог, сливки арааһын, арыы, быырпах оҥорон улууска, Дьокуускайга атыыга таһаараллар.
Өссө былырыын улуус дьаһалтатын көмөтүнэн ууну ыраастыыр станцияны үлэлэтэн, ыраас ууну оҥорон атыыга таһаарбыттара.
Мария Аргунова.