Бүгүн тоҕус Дьоруойдаах Уус Алдан улууһун килбэйэр киинигэр Мүрү нэһилиэгэр Лөгөй Тойон аатынан болуоссакка Арассыыйа Дьоруойун үрдүк аатын сүкпүт Алексей Неустроевы чиэстиир дьоро бэлиэ түгэн буолла.
Оскуола үөрэнээччилэриттэн саҕалаан ытык саастаахтарга тиийэ дьон-сэргэ хотоҕолуу мустан Ийэ дойдубут чиэһин көмүскүүр эбээһинэһин хорсуннук толорбут Дьоруойбутун уруйдуу-айхаллыы көрүстүбүт. Биир дойдулаахпытынан киэн туттан туран үүнэр ыччакка дойдуга бэриниилээх, эр санаалаах буоларга хорсун холобуру көрдөрбүт Алексей Михайловичка улуус баһылыгын дуоһунаһыгар кандидат Алексей Федотов улуус дьонун-сэргэтин аатыттан УАЗ-фургон массыынаны, улууспут нэһилиэктэрин баһылыктара үөр сылгыны, кини доҕоро Айаан Никифоров уһаайба сирин дохсун ытыс тыаһыгар бэлэх ууннулар.
Бу күн эрдээх буолуу уонна дойдунан киэн туттуу туһунан ырыа-тойук ылланна. Улууспут дьоно Арассыыйа Дьоруойун илэ-чахчы көрөн, бу устуоруйаҕа хаалар бэлиэ түгэҥҥэ кыттан өрө көтөҕүллэн тарҕастылар.
Мария Аргунова