Бу ый 11-с күнүгэр Танда орто оскуолатын тириэньэригэр Максим Аммосовка СӨ Үтүөлээх тириэньэрэ үрдүк ааты иҥэрэр туһунан уураах таҕыста.
Максим Николаевич ийэтэ Байаҕантай, аҕата II Байаҕантайтан төрүттээх учуутал идэлээх дьон этилэр. Максим физкультура идэтигэр икки үөрэҕи бүтэрэн (ЯПУ, ЯГУ), 1996 сыллаахтан Танда оскуолатыгар физкультура учууталынан, онтон тириэньэринэн үлэтин саҕалаабыта.
Кини билигин оҕолору волейболга дьарыктыыр, улууспут ДЮСШ-тын Тандатааҕы филиалыгар тириэньэринэн үлэлиир. Кыһынын классическай волейболга, оттон бэс ыйыттан, бэйэтин иккис уһаайбатын былаһаакка оҥорон туран, пляжнай волейболга дьарыктыыр.
Аан бастакытын 1999 сыллаахха Уус Алдан хамаандатын өрөспүүбүлүкэ таһымнаах күрэхтэһиигэ кытыннаран бочуоттаах 3-с миэстэҕэ таһаарыаҕыттан кынаттанан, бииртэн биир ситиһиилэргэ хардыылаан испитэ.
Олортон бэрт аҕыйаҕы бэлиэтээтэххэ, «Азия оҕолоро» оонньууларга уолаттары эрчийэн Саха сирин сүүмэрдэммит хамаандатыгар киллэрбитэ. Амма улууһугар буолбут Саха сирин норуоттарын спортивнай оонньууларыгар пляжнай волейболга Максим Николаевич оскуоланы бүтэрбит оҕолору эрчийэн, кыргыттар 28 хамаандаттан кыайыылаах тахсан үөрүү өрөгөйүн билбиттэрэ. Оттон уолаттар хамаандалара 30 хамаандаттан 3-с миэстэҕэ тиксибиттэрэ үгүс сыраттан тахсыбыт түмүгү көрдөрөн үөрдүбүтэ. Оттон былырыын улууспутугар ыытыллыбыт Саха сирин норуоттарын спортивнай оонньууларыгар кыргыттар волейболга хамаандалара бастакы миэстэни ылбыта. Итиэннэ, Уһук Илиҥҥи күрэхтэһиилэргэ үс төгүл миэстэлэспиттэрэ уонна өрөспүүбүлүкэ таһымнаах үгүс күрэхтэһиигэ чемпион үрдүк аатын ылан турардаахтар.
Максим Аммосов атырдьах ыйын 12-13 күннэригэр Алдаҥҥа ыытыллыбыт пляжнай волейбол күрэхтэһиитигэр кыргыттарга үс оскуола хамаандатын уонна икки устудьуон кыыс хамаандатын илдьэн кытыннарда. Манна Алдан, Амурскай уобалас, Томмот, Нерюнгри хамаандаларын кытта оонньоон устудьуон кыргыттар бастакы миэстэни ылан үөрүүлэрэ үксээтэ. Манна даҕатан эттэххэ, бу хамаанда быйылгы өрөспүүбүлүкэ чемпионатыгар эмиэ бастаан турардаах уонна Кубок Федерации күрэхтэһиигэ 2-с миэстэни ылбыттаах.
Волейбол көрүҥэр улууска аан бастакынан Саха Өрөспүүбүлүкэтин үтүөлээх тириэньэрэ ааты ылбыт биир дойдулаахпытынан киэн тутта эҕэрдэбитин тиэрдэбит.
Мария Аргунова