Биһиги оскуолабытыгар элбэх уопуттаах учуутал баар, кинилэртэн мин биир саамай сөбүлүүр учууталым туһунан билиһиннэриэм.
Сардаана Иннокентьевна Ушницкая – саха тылын уонна литэрэтиирэтин учуутала уонна биһиги кылааспыт салайааччыта. Аан бастаан алтыс кылаас боруогун атыллыырбытыгар, кини оскуолабытыгар учууталлыы кэлбитэ.
Биһиги кылааспыт оҕолорун кытары бэһис кылаастааҕы салайааччыбытыгар олуһун диэн үөрэммиппит, ол иһин бастаан долгуйан да биэрэр этибит. Баҕар кыыһырымтаҕай, ол эбэтэр кытаанах учуутал буолуо дии саныырбыт. Ол гынан баран, Сардаана Иннокентьевна биһиги санаабыппытыттан олус атын, хас саҥа уруогун аайы кини биһиэхэ чугаһаатар чугаһаан иһэр.
Элбэх оҕо саха тылын уруога наһаа бытааннык, интэриэһинэйэ суох ааһар дииллэр. Оттон, мин санаабар, саамай интэриэһинэй уруогунан саха тыла уонна литэрэтиирэтэ буолар. Онон уруок бүтэрин хаһан да кэтэспэтэҕим, хата бүппэтэ эбитэ буоллар диэн саныыбын. Онно барытыгар учуутал үөрэтэрэ эппиэттиир. Кини уруоктарын куруук аныгылыы, өйдөнөрдүк уонна үрдүк таһымнаахтык ыытар, хаһан да чуҥкуйбаккын. Уруоктан ураты кини биһиэхэ араас оонньуулары оонньотор, элбэх күрэхтэргэ кытыннарар, киинэҕэ уонна экскурсияҕа илдьэ барар. Элбэхтик тэҥҥэ сылдьарбытыттан кылааспыт иллээх уонна бастыҥ буолар.
Төрүт тылбытын сайыннарарыгар, элбэх билиини биэрэригэр улаханнык махтанабын! Ытыктыыр учууталбын Учуутал күнүнэн истиҥник эҕэрдэлиибин!
Ньургуйаана Гуляева, Чараҥ орто оскуолатын 9 кылааһын үөрэнээччитэ, «Өркөн» оҕону эбии үөрэхтээһин киинин пресс-киинин кэрэспэдьиэнэ